Белбоғли кураш бўйича жаҳон чемпионати ва кубогида спортчиларимиз 36 та медални қўлга киритди

23:20 07 Ноябрь 2022 Спорт
799 0

Россиянинг Қозон шаҳрида белбоғли кураш бўйича 15-17 ёшли ўғил болалар ва қизлар ўртасида жаҳон чемпионати ҳамда катталар ўртасида жаҳон кубоги мусобақалари бўлиб ўтди.

26 та давлатдан 300 нафардан ортиқ спортчилар иштирок этган жаҳон чемпионати баҳсларида полвонларимиздан Феруза Собирова, Қувончбек Эрмуҳаммедов, Ясмина Содиқова, Самандар Солиев олтин, Жўрабек Мамадалиев, Ўролбек Сарабеков, Фотиҳ Пўлатов, Жавоҳирбек Нуъмонжонов, Нилуфар Исоқова кумуш, Арофатхон Муҳамадова, Гавҳар Абдусобирова, Рўзихон Ғанижонова, Меҳринисо Каримова, Фозилбек Абдураҳматов, Асадбек Икромов, Муҳаммадқодир Каримжонов, Қувончбек Азимов, Шодилбек Шодилбеков, Шоҳруҳбек Шодаҳмадов, Нафрузбек Мамаюсупов ва Диёрбек Ёқубов ўз вазн тоифасида бронза медални қўлга киритди.

Жаҳон кубогининг классик йўналишда ҳамюртларимиз 1 та олтин, 2 та кумуш, 6 та бронза, эркин йўналишда эса 1 та кумуш 6 та бронзага эга чиқишди. Ушбу мусобақаларда юртдошларимиздан Мираншоҳ Рўзиев, Элмурод Абдуллаев, Жамшид Эгамовлар ҳакамлик қилишди.

Шунингдек, жаҳон кубоги доирасида Татаристон Республикаси Спорт вазири Владимир Леонов ҳамда жаҳон белбоғли кураш ассоциацияси президенти Азизбек Ғаниев, Ўзбекистон белбоғли кураш федерацияси раиси Равшан Дастиров, Тошкент вилояти спортни ривожлантириш бош бошқармаси бошлиғи Рустам Бобоқуловлар иштирокида ўзаро ҳамкорликни янги босқичга олиб чиқиш, жумладан, ёш ва умидли спортчиларни тайёрлашда илмий методик, ўқув-йиғин машғулотлар самарадорлигини ошириш сингари қатор масалаларни муҳокама қилишди.

Ташриф давомида Рустам Бобоқулов Қозон шаҳридаги эшкак эшиш спорт тури бўйича марказ фаолияти билан ҳам яқиндан танишди. Бундан ташқари, Россия Федерацияси Бошқирдистон Республикаси спорт вазирлиги билан ҳам ҳамкорлик доирасида келишувларга эришилди. Унга кўра, шунингдек, жаҳон белбоғли кураш ассоциацияси таклифига мувофиқ, жорий йил ноябрь ойининг учинчи ўн кунлигида Бошқирдистон Республикаси спорт вазири Руслан Ҳабибов бошчилигидаги делегация мамлакатимизга ташриф буюради.

Жаҳон кубогининг тантанали очилиш маросимида жаҳон белбоғли кураш ассоциацияси президенти Азизбек Ғаниев ҳамда Тошкент вилояти спортни ривожлантириш бош бошқармаси бошлиғи Рустам Бобоқуловга спортни ривожлантиришга қўшаётган ҳиссаси учун Татаристон Республикаси спорт вазирлиги томонидан кўкрак нишони топширилди.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?

Кўп ўқилганлар

Янгиликлар тақвими

Кластер