“Халқ сўзи Online”. Аҳмадали Шерназаров/Сирдарё. Сирдарё вилоятидаги “Беккластер” қўшма корхонасининг пахта қабул қилиш пунктида 66 та хирмонжой (бунт) бор. Уларнинг бари аллақачон пахта билан банд бўлди.Айни чоғда келаётган ҳосилдан қўшимча хирмонлар кўтарилмоқда.

Ҳозиргача кластер бўйича 43 минг тоннадан зиёд пахта териб олинди. Умумий кўрсаткич эса 44 минг тоннадан ошиши кутилмоқда.Бир неча йилдирки,тузилмада ғўза кўчатлари 76 схемасидаги қатор орасига ва гектарига анъанавийдан анча зиёд миқдор- 130-140 мингтагача жойлаштирилмоқда.Шунингдек, томчилатиб суғориш технологияси ҳам босқичма –босқич йўлга қўйилаётир. Жорий йилда 317 гектарда ана шу усул қўлланди.

Айтиш лозимки, ҳозиргача Сирдарё вилоятидаги тўртта – Мирзаобод, Сайхунобод, Ховос ва Боёвут туманларида шартномавий режалар бажарилди. Вилоят бўйича белгиланган бу борадаги марра ҳам тобора яқин қолмоқда. Энг муҳими эса ҳали далада ҳосил етарли. Буни вилоятда қабул пунктларига кунига 2 минг тоннага яқин ёки режанинг 1 фоизидан ортиқ ҳосил топширилаётганидан ҳам билса бўлади.