Украинага ҳаво қуроллари керак

АҚШ, Германия, Нидерландия, Италия ва Руминия НАТО саммитида Украинага яна бешта стратегик ҳаво мудофаа тизимини етказиб беришини эълон қилди.

Оқ уйга кўра, тўртта «Патриот» аккумулятори ва улар учун бутловчи қисмлар Киевга ўтказилади.

Бундан ташқари, яқин келажакда АҚШ ва иттифоқчилар Украинага ҳаво ҳужумидан мудофаа учун ўнлаб тактик тизимлар ва Гепард тизимларини етказиб бериш ниятида. Қўшма Штатлар, шунингдек, келаси йили Украина Қуролли кучларига юзлаб тутувчи ракеталарни топширишга ваъда берди.

«Иттифоқчилар коалицияси Украина ҳаво мудофаасини кучайтириш учун 1 миллиард доллардан ортиқ маблағ ажратишга келишиб олди», дейилади Оқ уй баёнотида.

«Уруш Украина эркин ва мустақил давлат бўлиб қолиши билан тугайди. Россия ғалаба қозонмайди. Украина ғалабага эришади», деган Жо Байден.

Владимир Зеленскийнинг идораси раҳбари Андрей Ермакнинг «Politico» нашрига айтишича, саммитдаги Украина делегацияси Россия ҳудудига зарбалар бериш учун АҚШ қуролларидан фойдаланишга қўйилган барча чекловларни олиб ташлашга эришмоқчи. Ҳозирда Киев узоқ масофали ракеталардан Қримга зарба бериш учун фойдаланмоқда.

«The Wall Street Journal» нашри хабарига кўра, Америка Қўшма Штатлари Украинага Россия ҳудудига ҳужумлар учун бир қанча турдаги ракета тизимлари ва артиллериядан фойдаланишга рухсат берди.

Исроилнинг Ғазо лагерига ҳужуми оқибатида 29 киши ҳалок бўлди

Исроил ҳаво кучларининг Ғазо жанубидаги мактаб яқинидаги қочқинлар лагерига уюштирган ҳужуми оқибатида камида 29 фаластинлик ҳалок бўлди. Ўнлаб одамлар яраланган.

Хабарларга кўра, Хон Юниснинг шарқий қишлоқларидан кўчирилган одамлар яшайдиган Ал-Авда мактаби ҳудудига зарба йўлланган.

Воқеа гувоҳларининг сўзларига кўра, ҳужум кенг кўламли вайронагарчилик, аёллар ва болаларнинг ўлимига олиб келган. Ўша пайтда бозор ва турар-жой бинолари жойлашган ҳудудга 3 мингга яқин одам тўпланган.

Исроил ҳарбийлари дастлабки учта зарбани ҲАМАС сиёсатчилари, полиция жангчилари база сифатида фойдалангани учун амалга оширганини айтди.

Хитой ва Россия қўшма машғулот бошлади

Россия ва Хитой ҳарбий-денгиз кучлари шу ҳафта Осиё ҳудудида қўшма денгиз машғулотлари ўтказиб, НАТОга қарши бирлашган кучларини кўрсатмоқда. Бу ҳаракат НАТО етакчиларининг Россиянинг давом этаётган ҳарбий ҳаракатлари фонида Украинани қўллаб-қувватлаш учун ташкил этилган Вашингтондаги йиғилиш билан бир даврга тўғри келди.

ТАСС хабарига кўра, Россиянинг «Резкий» ва «Громкий» номли икки ҳарбий кемаси Владивостокдан Осиё—Тинч океани минтақасидаги машғулотларда қатнашиш учун жўнатилган. Бу кемалар сув ости кемаларига қарши, ҳаво ҳужумидан мудофаа ва саботажга қарши машғулотлар ўтказади.

Япония мудофаа вазирлиги ушбу кемаларнинг Сусима бўғозидан ўтиб, Япон денгизидан Шарқий Хитой денгизи томон ҳаракатланаётганини аниқлади. Россиянинг яна бир «Карелия» айғоқчи кемаси, ҳам Шарқий Хитой денгизига кетаётгани радарларга тушиб қолган. Аммо унинг машғулотларда иштироки номаълум.

Бу ҳаракатлар АҚШ президенти Жо Байден НАТО етакчиларини, жумладан, Япония бош вазири Фумио Кисида ва Жанубий Корея президенти Юн Сук Ёлни қабул қилган пайтга тўғри келди. Саммит НАТОнинг Европадаги қарорини Осиёдаги муаммолар, хусусан, Украинани қўллаб-қувватлаш билан боғлиқ.

Таҳлилчиларнинг фикрига кўра, НАТОнинг янги котиби бошчилигидаги ташкилот Европага ҳеч қандай наф келтирмайди. Чунки Марк Рютте Вашингтон босими билан танланган.

Россиянинг императорлик амбициялари бор

Россиянинг ҳаракатлари совуқ урушнинг янгиланишига олиб келди. Ушбу фикрларни Полша президенти Анжей Дуда «Politico» нашрига берган интервьюсида айтиб ўтди.

Унинг сўзларига кўра, ҳозирги вазиятда АҚШ эмас, балки Россиянинг императорлик амбициялари айбдор.

Полша раҳбари Вашингтондаги НАТО саммитини шарҳлар экан, альянснинг кучи ва бирлигини кўрсатиш зарурлигини таъкидлади.

Аввалроқ, Дуда Россиянинг Украинадаги можародаги ғалабаси оқибатларини башорат қилган эди. Унинг фикрича, бу ҳолда Москва бошқа мамлакатларга «ҳужум қилиши» мумкин, улар орасида, унинг фикрича, Полша ҳам бўлиши мумкин.

Ўз навбатида, НАТО бош котиби Йенс Столтенберг Вашингтондаги саммитдаги нутқида Россиянинг Украинадаги ғалабаси альянс учун энг катта хавф, деб атади ва бунинг олдини олишга чақирди.