АҚШнинг «The New York Times», «New York Post», «NBC New York», «USA Today», «The Los Angeles Daily News» сингари етакчи оммавий ахборот воситаларида Оксана Чусовитинанинг Токиода ўтаётган XXXII ёзги Олимпия ўйинларидаги сўнгги иштироки ҳақида қатор мақолалар эълон қилинди.

Ўзбекистоннинг АҚШдаги элчихонасига кўра, барча нашрлар Оксана Чусовитинанинг Олимпия ўйинларидаги рекорд натижага, саккизинчи иштирокига эътибор қаратган. У 11 жаҳон чемпионатида 17 та медални қўлга киритган, жаҳон чемпионатлари ва Олимпия ўйинларида Оксана томонидан биринчи марта бажарилган машқлар ўзбекистонлик спортчи шарафига қўйилган.

Хусусан, «The New York Times» газетасида «46 ёшли Оксана Чусовитина сўнгги Олимпиададан бир олам қувонч олди» сарлавҳали мақола нашр этилди. Материалда «Чусовитина қарийб ўттиз йил давомида ўз спорт турида юқори натижаларни қайд этди», дея таъкидланади.

Муаллиф спортчимизнинг узоқ йиллик жисмоний ҳолатига қойил қолган ҳолда уни саккизинчи Олимпиадани «Ёшларга йўналтирилган спортдаги таъсирчан церийа», дея этироф этади ва «у узоқ умр кўриш ва мукаммалликни ошириш имкониятларини намойиш этди», деб қўшиб қўйди. Мақолада Оксана Чусовитинанинг шахсий ва касб фаолияти бўйича атрофлича маълумотлар ўқувчиларнинг эътиборига ҳавола этилган.

«Гимнастика майдонидаги ҳиссиётли лаҳзалар Чусовитина ўз дастурини якунлаганидан кейин содир бўлди, - деб ёзади нашр. – Албатта, спорт аренасида мухлислар жуда кам эди. Аммо шундай бўлсада, залдаги бошқа спортчилар ва мусобақада қатнашиш учун келган гимнастика олами вакиллари томонидан унга юксак ҳурмат кўрсатилди. Улар гимнастика қироличаси билан бирга селфига тушиш учун навбатда турди».

«New York Post» газетасида «Оксана Чусовитинанинг афсонавий Олимпия карьераси 46 ёшда тугади» сарлавҳали мақола чоп этилди. Мақолада Оксананинг спортдаги фаолияти «Ёрқин Олимпия карьераси» дея эътироф этилди. У Олимпия ўйинларида Ўзбекистон, Германия ва собиқ иттифоқ бирлашган жамоалари таркибида иштирок этган.

«NBC New York» нашри ушбу мавзуда эълон қилган материалда «Бўш аренада туриб олқиш оладиган гимнастикачилар саноқли. Саккиз карра Олимпиада иштирокчиси Оксана Чусовитинага спорт гимнастикаси бўйича саралаш мусобақасининг тўртинчи бўлимидаги сакрашидан кейин спортчилар ва ҳакамлар томонидан юксак эҳтиром кўрсатилди», дея қайд этилган.

«1975 йилда туғилган фахрий гимнастикачи Токио Олимпиадасида иштирок этаётган кўплаб гимнастикачилар туғилишидан олдин ўз фаолиятини бошлаган. Оксана нафақат узоқ умр кўриш учун, балки давомли муваффақияти учун ҳам спортда афсонадир», деб ёзади «NBC New York».

Мамлакатимизнинг АҚШдаги элчихонасидан хабар беришларича, кўплаб америкалик спортчилар Ўзбекистон Олимпия терма жамоаси вакили шарафига билдирилган энг илиқ сўз ва тилакларни миллионлаб обуначиларга эга ижтимоий тармоқлардаги саҳифаларига ҳам жойлаштирмоқда

Масалан, АҚШ вакили, уч карра Олимпиада чемпиони Александр Райсман «Twitter»даги саҳифасида Оксана Чусовитина 1992 йилдаги ёзги Олимпия ўйинларида, Александра Райсман туғилишидан икки йил олдин сакрашни амалга оширган видеони эълон қилди ва Оксана Чусовитинани «абадий афсонавий спортчи», дея таърифлади.