Айрим хусусий шифохоналар сабаб коронавирусга чалинган беморлар аҳволи оғирлашмоқда — ССВ

22:01 16 Октябр 2020 Жамият
670 0

Соғлиқни сақлаш вазирлиги коронавирус инфекциясини аниқлаш ва даволашда белгиланган тартибларга риоя қилинмаса, ҳуқуқий таъсир чоралари мавжуд эканлигини хусусий шифохоналарга мунтазам эслатиб келмоқда. Аммо шунга қарамасдан, айрим хусусий шифохоналарда коронавирусга чалинган беморларни даволашда тасдиқланган стандартларга риоя қилмаслик натижасида жиддий ва қалтис хатоларга йўл қўйилаётгани маълум бўлмоқда. Бу ҳақда ССВ Матбуот хизмати маълумот берди.

Мисол учун, коронавирусни даволаш билан шуғулланаётган хусусий шифохоналар фаолияти юзасидан ретро-проспектив текширувлар ўтказилганда, олий тоифали пульмонолог З.Ю. томонидан бир оиланинг 3 аъзосига, аҳволи енгил даражада бўлишига қарамасдан, 12 турдаги (!) дори воситасини («Аскорбин» кислота, «Бактазон», «Моксив», «Дексаметазон», «Вобензим», «Тромбонет», «Курантил», «Ларитидин», «Флюконазол», «Амброксол», «Цинк», «Верошпирон») тавсия қилингани қайд этилди.

Шунингдек, бошқа бир хусусий шифохонада фаолият юритган оториноларингология ихтисослиги бўйича 2-курс клиник ординатори И.Б. айрим беморларга, улар касалликнинг енгил даражасини ўтказаётганига қарамасдан, бир вақтнинг ўзида 10 га яқин («Сефепим», «Ацикловир», «Дексаметазон», «Амброксол», «Клексан», «Курантил», «Кардиомагнил», «Верошпирон») дори воситаларини ҳамда ингаляция учун «Декосан» + «Дексаметазон» + «Димедрол» дори воситалари аралашмаларини тавсия қилгани аниқланди.

Иккала ҳолатда ҳам беморларнинг аҳволи ёмонлашганлиги сабабли Республика вирусология илмий текшириш институти клиникасига ётқизилган.

Шунингдек, сўнгги бир ярим ой мобайнида хусусий шифохоналардан биргина Республика шошилинч тиббий ёрдам илмий марказига жами 17 нафар бемор белгиланган даво стандартларига амал қилинмагани, меъёридан ортиқ миқдорда антибиотик ва бошқа тавсия этилмаган турли хил инфузион дори воситалари қўлланилгани учун оғир аҳволда кўчирилгани маълум бўлган. Бу каби беморлар Зангиота туманидаги юқумли касалликлар шифохоналари ва вазирлик тасарруфидаги бошқа даволаш муассасаларига ҳам ётқизилган.

Соғлиқни сақлаш вазирлиги томонидан пойтахтимизда ўтказилган текширув натижалари бўйича 4 та хусусий шифохонага берилган лицензия тугатилди, 2 тасида лицензиянинг амал қилиш муддати 10 кунга тўхтатилди, яна 2 тасига эса камчиликларни бартараф этиш бўйича бажарилиши мажбурий бўлган кўрсатмалар берилди.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?