Германиянинг Lufthansa авиакомпаниясига қарашли самолёт

14 та хорижий авиакомпания Ўзбекистонда фаолият юритишга қизиқиш билдирмоқда. Бу ҳақда Туризмни ривожлантириш давлат қўмитаси раиси биринчи ўринбосари в.б. Улуғбек Қосимхўжаев йил якунларига бағишлаб ташкил қилинган матбуот анжумани вақтида маълум қилди.

Қосимхўжаевнинг айтишича, унинг ўзи тўртта катта лоукостер компания билан музокара олиб борган. “Ҳозирда жами Ўзбекистон бозорига 14 та турли компания қизиқиш билдирмоқда. Бу фақатгина лоукостерлар эмас. Улар орасида - KLM (Нидерландия), Lufthansa (Германия), Lion Air (Индонезия) ва бошқалар”, - деди Қосимхўжаев.

Туркиянинг иккита лоукостери Pegasus Airlines ва Atlasglobal, шунингдек, БААдан Flydubai ҳамда Россиядан яна бир компания Ўзбекистон бозорини кузатмоқда.

“2018 йил авиация соҳасида катта ўзгаришлар бўлди, “Ўзбекистон ҳаво йўллари” монополияни йўқотди. Аэропортларни бошқариш функцияси Uzbekistan Airportsʼга берилди. Энди ким бозорга кириши масаласи бевосита бош вазирнинг ваколатлари орасида”, - дея қўшимча қилиб ўтди у.