Суданда сўнгги тўрт кун ичида тошқиндан жабрланганлар сони 160 мингга кўпайиб, деярли 720 мингга етди. 102 киши табиий офат қурбонига айланди.

Бу ҳақда “Sinxua” агентлиги БМТнинг гуманитар тузилмаларига асосланиб хабар берди.

Маълумотларга кўра, Суданда 71 мингдан зиёд уй вайрон бўлган, яна 72 минггига зарар етган, 3,3 минг бош чорва моллари нобуд бўлган.

Мамлакат ҳукумати, БМТ муассасалари ҳамда нодавлат ташкилотлар томонидан 200 минг кишига тиббий, озиқ-овқат ва бошқа ёрдам кўрсатилган.

Гарчи Мовий Нил бўйидаги кузатув станциялари дам олиш кунлари сув сатҳининг 3 мм пасайганлигини қайд этган бўлсада, метеорологлар кучли ёмғир ва тошқинлар ҳақида огоҳлантиришмоқда.

Аввалроқ Судан Хавфсизлик ва мудофаа кенгаши тошқинлар сабабли мамлакатда уч ой муддатга фавқулодда ҳолат жорий этгани ва уни табиий офат зонаси деб эълон қилгани ҳақида хабар берилган, энг кўп зарар кўрган ҳудудлардан бири эса мамлакат пойтахти Хартум бўлган эди.