Foto: Hasan Paydoyev, "Xalq so'zi"

Markaziy harbiy okrugi qoʻmondonligi tashabbusi bilan “Forishʼʼ togʻ poligonida respublikaning turli nashrlarida faoliyat olib borayotgan jurnalist va blogerlar oʻrtasida oʻziga xos musobaqa va press-tur tashkil etildi.

“Forishʼʼ togʻ poligoniga yetib borgan ishtirokchilar dastlab harbiy-jangovar texnikalarda otish maydoni tomon yoʻl oldi. Mudofaa vazirligi miqyosida birinchi marta oʻtkazilayotgan ushbu musobaqa shartlariga koʻra, jurnalist va blogerlar poligonda oʻq otish mashqlarini bajardi. Har bir ishtirokchi merganlik qobiliyatini sinovdan oʻtkazdi. Shuningdek, musobaqa ishtirokchilari jangovar texnikalardagi ekipaj tarkibida 10 km masofaga harakatlandi.

Shundan soʻng ishtirokchilar harbiy texnikalar va qurol-aslahalar koʻrgazmasida ishtirok etib, bugun harbiylarimiz foydalanayotgan texnikalar boʻyicha maʼlumotga ega boʻlishdi. Harbiylarning yashash tarzi va yaratilgan sharoitlar bilan tanishgan ishtirokchilarga Vatanimiz posbonlarining jangovar tayyorgarligi boʻyicha koʻrgazmali chiqishlar ham namoyish etildi.

Yakunda Markaziy harbiy okrug qoʻshinlari qoʻmondoni polkovnik Oybek Saidov bilan davra suhbati tashkil etildi. Pistoletdan otish boʻyicha eng yuqori natija koʻrsatgan ikki qatnashchiga qoʻmondonning maxsus sovgʻasi topshirildi. Musobaqaning barcha ishtirokchilariga esdalik uchun harbiy anjomlar sovgʻa qilindi.