Foto: Illustrativ foto

Jahon sogʻliqni saqlash tashkilotining soʻnggi hisobotiga koʻra, oʻtgan haftada dunyo boʻyicha maymun chechagini yuqtirganlar safiga yana 5907 nafar bemor qoʻshildi.

Oqibatda aprel oyidan shu kungacha mazkur xavfli infeksiya aniqlangan mamlakatlar soni 98 taga yetdi. Kasallikdan aziyat chekayotgan bemorlar soni esa 45 ming nafardan oshdi.

Xususan, yangi epidemiya oʻtgan haftada Eron va Indoneziya davlatlariga ham kirib borgan. Shunga qaramay, 15-21-avgust sanalarida maymun chechagi bilan xastalanish holatlari undan avvalgi haftaga nisbatan 21 foizga kamaydi.

Tahlillarga koʻra, infeksiyani yuqtirganlarning 98 foizdan ortigʻi erkaklar boʻlib, ularning oʻrtacha yoshi 36 ga teng. Jami bemorlarning 60 foizi AQSHda, 38 foizi Yevropa mamlakatlarida roʻyxatga olingan.

Haftalik oʻsish dinamikasi asosan Afrika davlatlari, xususan, Nigeriya va Kongo aholisi hissasiga toʻgʻri kelmoqda. 15-21-avgust kunlari mazkur qitʼada 219 nafar bemor kasallikka chalingani maʼlum boʻldi. Bu 8-14-avgust sanalariga qiyoslaganda 54 foiz yuqori koʻrsatkichdir.

Shundan kelib chiqib, JSST birinchi navbatda xavf guruhiga mansub aholi qatlami hamda tibbiyot xodimlari chechakka qarshi emlanishi zarur, degan xulosada.