Foto: Xalq so‘zi

Jahon sogʻliqni saqlash tashkiloti sayyoramizdagi epidemiologik vaziyat boʻyicha navbatdagi hisobotini eʼlon qildi. Unga koʻra, oʻtgan haftada 2,6 milliondan ortiq kishida SOVID-19 aniqlanib, bemorlarning qariyb 8,5 ming nafari hayotdan koʻz yumdi.

Tahlillar 21-27-noyabr sanalarida dunyo boʻyicha koronavirusga chalinish holatlari 2 foizga oshganini tasdiqlaydi. Shunga qaramay, xastalik qurbonlari soni 5 foizga kamaygani biroz taskin beruvchi koʻrsatkich.

Kasallanishlar sonining sezilarli oʻsishi Janubiy va Shimoliy Amerika qitʼalari (+19 foiz) hamda Gʻarbiy Tinch okeani mintaqasi mamlakatlarida (+ 8 foiz) roʻyxatga olindi. Afrika (-18 foiz), Sharqiy Oʻrta yer dengizi mintaqasi (-17 foiz), Yevropa (-14 foiz) hamda Janubi-Sharqiy Osiyoda (-8 foiz) esa aksincha pasayish dinamikasi qayd etildi.

Oʻlim koʻrsatkichlari esa asosan Afrika (-79 foiz), Yevropa (-35 foiz) va Sharqiy Oʻrta yer dengizi mintaqasi mamlakatlarida (-20 foiz) kamaydi. Amerika (+21 foiz), Gʻarbiy Tinch okeani mintaqasida (+9 foiz) va Janubi-Sharqiy Osiyoda (+5 foiz) buning aksi kuzatildi.

Oʻtgan haftada eng koʻp bemorlar aniqlangan mamlakatlar:

Yaponiya — 698 ming;

Janubiy Koreya — 378 ming;

AQSH —296 ming;

Fransiya — 230 ming;

Italiya 161 ming.

Eng koʻp oʻlim holatlari qayd etilgan davlatlar:

AQSH — 2611;

Yaponiya — 1000;

Braziliya — 535;

Italiya — 419;

Xitoy — 395.