Jizzax viloyatida noqonuniy tarzda tuproq qazib olgan fuqarolar javobgarlikka tortildi. Bu haqda Ekologiya, atrof-muhitni muhofaza qilish va iqlim oʻzgarishi vazirligi xabar qildi.

Qayd etilishicha, Ekologiya, atrof-muhitni muhofaza qilish va iqlim oʻzgarishi boshqarmasi tomonidan navbatdagi reyd tadbirlari oʻtkazildi.

Natijada, Gʻallaorol tumani hududida fuqaro O.S. oʻzi boshqaruvida boʻlgan yuklovchi transport vositasi yordamida “Qashqabuloq” MFY “Qoraqoʻyli” qishlogʻining tuman zaxira yer maydoni hududidan noqonuniy ravishda tuproq qazib ortib ketayotganligi aniqlandi.

Bu holat boʻyicha fuqaroga nisbatan MJtKning 70-moddasi 1-qismi bilan maʼmuriy bayonnoma rasmiylashtirilib, bazaviy hisoblash miqdorining 11 baravari — 4 million 125 ming soʻm miqdorida jarima qoʻllanildi. Shuningdek, tabiatga 2 million 450 ming soʻm miqdorida zarar yetkazilganligi hisoblandi. Huquqbuzar jami 6 million 575 ming soʻm toʻlaydigan boʻldi.

Boshqa bir holatda esa “Qashqabuloq” MFY hududida fuqaro A.Sh. noqonuniy ravishda tuproq qazib olib, ortib ketayotgan vaqtida toʻxtatildi. Unga nisbatan MJtKning 70-moddasi 1-qismi bilan maʼmuriy bayonnoma rasmiylashtirilib, BHMning oʻn bir baravari — 4 million 125 ming soʻm jarima qoʻllanildi.

Avvalroq fuqaro mashinasining old kapotiga himoya plyonkasini yopishtirib, ichiga suv va baliqlar solib harakatlangani aks etgan videolar yuzasidan Ekologiya vazirligi munosabat bildirgani haqida xabar qilgandik.