Istam IBROHIMOV/“Xalq soʻzi”. Issiq jon isitmasiz boʻlmaydi. Tobingiz qochganida shifokorlar joningizga oro kiradi. Ular shirinsuxan, faoliyat yuritayotgan maskanlaridagi shart-sharoitlar koʻrsa havas qilgulik darajada boʻlsa, bu albatta, ruhiyatingizga ijobiy taʼsir koʻrsatadi. Tuzalishingiz oson kechadi.

Jondor tumani “Qorovul” hamda “Xumdonak” mahalla fuqarolar yigʻinlari hududida joylashgan Mahmud Torobiy oilaviy shifokorlik punkti hamda 20–son oilaviy poliklinikaning zamonaviy binosini koʻrib ana shunday fikrga kelasiz. Har ikkala maskan binosi yangitdan qurilib, foydalanishga topshirildi. Ular jami 9 ming nafar aholiga tibbiy xizmat koʻrsatadi. Shifo maskanlari keng va yorugʻ xonalardan iborat. Stomatolog, akusher–ginekolog, umumiy amaliyot shifokori, patronaj hamshiralarning bemorlarga sifatli tibbiy xizmat koʻrsatishlari uchun zarur barcha qulayliklar yaratilgan. Kunduzgi shifoxona ham mavjud.

— Davlatimiz tomonidan tibbiyotni quyi tizimdan boshlab rivojlantirishga katta eʼtibor qaratilyapti, — deydi Buxoro viloyat sogʻliqni saqlash boshqarmasi bosh mutaxassisi Maʼmuraxon Safoyeva. — Eng chekka goʻshalarda ham tibbiyot muassasalarining xalqaro andozalar darajasidagi bino va inshootlari qurilayapti. Jondor tumanida foydalanishga topshirilgan shifokorlik punkti va oilaviy poliklinika “Inson qadri uchun” tamoyili asosida amalga oshirilayotgan bu ishlarga yaqqol misoldir.

Viloyatda ayni damda 82 ta oilaviy poliklinika, 96 ta oilaviy shifokorlik punkti aholiga tibbiy xizmat koʻrsatmoqda.