Foto: Xalq so‘zi

Fargʻona viloyati Yozyovon tumanidagi “Xonobod” mahalla fuqarolar yigʻini hududida hashar yoʻli bilan Yoshlar bogʻi tashkil etildi.

Yozyovon tuman hokimligi tashabbusi bilan boshlangan xayrli ishga 500 million soʻm miqdorida mablagʻ jalb qilinib, salkam bir gektar maydondan iborat ushbu bogʻda turfa daraxt nihollari, anvoyi gullar oʻtqazildi, favvora, amfiteatr, Vook-cafe, sport maydoni barpo etildi.

Mamlakatimiz mustaqilligining 31 yilligi arafasida Yoshlar bogʻining foydalanishga topshirilishi munosabati bilan oʻtkazilgan tadbir yozyovonlik 31 nafar kichkintoyning sunnat toʻyiga ulanib ketdi.

Nuroniylar, yoshlar, keng jamoatchilik vakillari ishtirok etgan tantanada fayzli dasturxon yozildi. Toʻy bolalarga kitoblar, velosiped, oʻyinchoq va shirinliklar sovgʻa qilindi. Taniqli sanʼatkorlar ishtirokidagi konsert dasturi barchaga yanada xush kayfiyat baxsh etdi.

Botir Madiyorov, “Xalq soʻzi”.