Yangihayot tumanidagi 400dan ziyod ikki qavatli yogʻoch uylar buziladi

17:20 25 Fevral 2021 Jamiyat
1868 0

Toshkent shahridagi Yangihayot tumani hududida joylashgan 400dan ziyod ikki qavatli yogʻoch uylar buziladi va ularda yashovchi 4 mingdan ziyod xonadon yangi tuman markazida quriladigan yangi uylarga koʻchiriladi. Bu haqda AOKAda oʻtkazilgan matbuot anjumanida tuman hokimi Hayot Inogʻomov maʼlum qildi.

«Tuman markazida 149 gektar hududda xavfsizlik talablariga javob bermaydigan ikki qavatli yogʻoch uylar bor. Bular 1966-yildagi voqealar vaqtida tez fursatda qurilgan uylar, hozirgi kunga kelib koʻpchiligi avariya holatiga kelib qolgan. Biz turkiyalik mutaxassislar bilan hamkorlikda loyiha ishlab chiqyapmiz, hozir yer tanlash jarayoni ketmoqda, yer tanlangach shu yerga uylar qurib, aholini yangi uylarga koʻchiramiz. Hamma kommunikatsiyasi, sharoiti bor uylarga koʻchiriladi, sharoitini yaxshilab beramiz. Loyiha doirasida ushbu bosqichda jami 409ta avariya holatidagi uylarni buzib ulardagi 4314ta xonadonda yashayotgan mulkdorlar uchun tuman markazidan yangi zamonaviy uylar qurish rejalashtirilgan. Yangi quriladigan uylar va unda yashaydigan aholi soniga mos ravishda maktab, MTT, sport, madaniyat muassasalari qurish rejamiz bor», dedi Yangihayot tumani hokimi Hayot Inogʻomov.

Maʼlumot uchun, Yangihayot tumani hududi 4 419,6 gektarni tashkil etadi va unda 150 mingga yaqin aholi yashaydi.

Inobat AHATOVA,

“Xalq soʻzi”

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?