Ijtimoiy tarmoqlarda voyaga yetmagan qizni tazyiq va zoʻravonlik bilan fohishalik qilishga majburlash holatlari aks etgan video tasvirlar keng tarqaldi. Mazkur holat yuzasidan Andijon viloyati IIB munosabat bildirdi

Unda aytilishicha, ushbu holat Ichki ishlar organlari tomonidan oʻrganilib, videotasvirdagi ayollarning shaxsiga aniqlik kiritilgan.

Oʻrganish ishlari davomida muqaddam jinoyat kodeksining bir qator moddalari bilan sudlangan, 2004-yilda tugʻilgan Sh.T. unga tanish boʻlgan 2008-yilda tugʻilgan, M.M.ni Toshkent shahar, Mirzo Ulugʻbek tumanidagi xonadonda ushlab turgan. Bundan tashqari, qizning telefon apparatini talon taroj qilib, sotib yuborgani ham maʼlum boʻlgan.

Shuningdek, M.M.ning ojiz ahvoldaligidan foydalanib, unga muntazam ravishda tazyiq oʻtkazib kelgani oydinlashgan.

Mazkur holat yuzasidan jabrlanuvchi M.M.ning huquqlari qonuniy asosda tiklanib, Andijon viloyati IIB tomonidan gumonlanuvchi Sh.T.ga nisbatan JKning 138-moddasi 2-qismi “a” bandi 135-moddasi 3-qismi “a, b” bandi va 166-moddasi 2-qismi “a” bandi, bilan jinoyat ishi qoʻzgʻatilib, unga nisbatan “qamoqqa olish” tarzidagi ehtiyot chorasi qoʻllanilgan.

“Hozirda jabrlanuvchi M.M.ga Ijtimoiy himoya milliy agentligi Andijon viloyati boshqarmasi tomonidan psixologik, yuridik va ijtimoiy yordamlar koʻrsatilmoqda”, — deyiladi xabarda.