Foto: Tashqi ishlar vazirligi matbuot xizmati

2022-yil 12-iyul kuni Moskva shahrida Oʻzbekiston Respublikasi tashqi ishlar vaziri Vladimir Norov boshchiligidagi delegatsiya Rossiya Federatsiyasi Federal Majlisi Davlat Dumasi raisi Vyacheslav Volodin bilan uchrashuv oʻtkazdi.

Soʻnggi yillarda Oʻzbekiston-Rossiya parlamentlararo aloqalari va almashuvlarini salmoqli darajada jadallashtirib borayotgani mamnuniyat bilan qayd etildi. Bu ikki mamlakatning strategik sheriklik va ittifoqchilik munosabatlarini mustahkamlashga xizmat qilayotgani eʼtirof etildi.

Ikki mamlakat qonun chiqaruvchi organlarining oliy darajadagi kelishuvlarni amalga oshirishdagi faol ishtirok etishi hamda parlament diplomatiyasi imkoniyatlaridan kengroq foydalanishning muhimligi qayd etildi.

Tomonlarning xalqaro parlamentlararo tashkilotlar doirasidagi hamkorlikni yanada chuqurlashtirishga tayyorligi haqida taʼkidlandi.

Rossiya tomoni Oʻzbekistonda Asosiy qonunga oʻzgartish va qoʻshimchalar kiritish boʻyicha amalga oshirilayotgan ishlar, Konstitutsiyaviy islohotlarning asosiy yoʻnalishlari va oʻzgarishlar yuzasidan jamoatchilik muhokamasi jarayoni bilan tanishtirildi.