Foto: Xalq so‘zi

Maʼlumki, Sirdaryo viloyati Xovos tumanida Turkiyaning “Cengiz Enerji” kompaniyasi tomonidan qisqa muddatda 220 MVt quvvatiga ega gaz-porshenli issiqlik elektr stansiyasi qurildi. Yil oxiriga qadar mazkur korxona toʻliq quvvatda ishlashi kutilmoqda.

Sirdaryo viloyati hokimi vazifasini bajaruvchi Akmaljon Mahmudaliyev mazkur kompaniya bosh direktori Axmed Jengizni qabul qildi. Muloqotda oʻzaro sheriklik munosabatlarini yanada rivojlantirish, hamkorlik aloqalarni kengaytirishga doir dolzarb masalalar muhokama etildi.

Xususan, Turkiya kompaniyasi rahbari Xovos tumanida elektr stansiyasi qurish loyihasi muvaffaqiyatli boʻlganini taʼkidlab, yana bir yirik, qiymati 300 million AQSH dollarilik quvvati 450 MVt boʻlgan gaz-porshenli elektr stansiyasini qurish loyihasi ishlab chiqilayotganini bildirdi.

Akmaljon Mahmudaliyev viloyatning iqtisodiyoti, sanoat korxonalarining ishlab chiqarish quvvatlari yildan-yilga oʻsayotgani, bunda elektr energiyaga boʻlgan talab yanada ortishini, mazkur sohada hamkorlik qilishga tayyor ekanligini taʼkidladi va kompaniya loyihasi boʻyicha tegishli vazirlik hamda idoralar bilan qoʻshimcha muzokaralar olib borilishini maʼlum qildi, deyiladi Sirdaryo viloyati hokimligi axborot xizmati xabarida.

Ahmadali SHERNAZAROV, “Xalq soʻzi”.