Turizmni tiklash va rivojlantirishga qaratilgan chora-tadbirlarning amalga oshirilishi holati yuzasidan hukumatga parlament soʻrovi yuborildi

14:26 29 May 2021 Jamiyat
210 0

Oliy Majlis Senatining oʻn beshinchi yalpi majlisida Koronavirus pandemiyasidan keyin turizmni tiklash va rivojlantirishga qaratilgan chora-tadbirlarning amalga oshirilishi holati yuzasidan Oʻzbekiston Respublikasi Vazirlar Mahkamasiga parlament soʻrovi yuborish toʻgʻrisidagi masala koʻrib chiqildi.

Boʻlib oʻtgan muhokamalarda senatorlar soʻnggi yillarda Oʻzbekiston Respublikasida iqtisodiyotning strategik sohasiga aylangan turizm sohasi pandemiya paytida eng koʻp zarar koʻrganligini taʼkidladilar. Xususan, global koronavirus pandemiyasidan oldin mazkur soha oʻz taraqqiyotida eng yuqori koʻrsatkichlarga erishgan edi. Jumladan, agar 2019-yil oxirida mamlakatga 6,7 ​​mln chet ellik sayyoh tashrif buyurgan boʻlsa, 2020-yilda bu koʻrsatkich atigi 1,5 mln sayyohni tashkil etdi. Bundan tashqari, koʻrilgan zararlar natijasida tadbirkorlarning katta qismi oʻz faoliyatini toʻxtatib turishga majbur boʻldi.

Turizm sohasining jadal tiklanishini, chet ellik sayyohlarni mahalliy turistlar bilan almashtirilishini taʼminlash maqsadida mamlakat Prezidentining ikkita farmoni va bitta qarori, shuningdek Vazirlar Mahkamasining uchta qarori qabul qilindi. Ushbu normativ-huquqiy hujjatlar doirasida davlat tomonidan sohani qoʻllab-quvvatlash boʻyicha qator ustuvor choralar koʻrildi. Xususan, turizm sohasida oʻz faoliyatini amalga oshiruvchi tadbirkorlik subyektlari uchun jami 50 dan ortiq turli xil imtiyoz va preferensiyalar belgilandi.

Shuningdek, mamlakatning bir qator aeroportlarida “ochiq osmon” rejimini oʻrnatish, fuqarolari Oʻzbekistonga vizasiz tashrif buyurishi mumkin boʻlgan mamlakatlar roʻyxatini kengaytirish boʻyicha chora-tadbirlar koʻrildi, sayyohlar uchun “Uzbekistan/ Safe travel GUARFNTEED” xizmati, ilk bor “Fast Track” sanitariya-epidemiologiya xavfsizlik tizimi joriy etildi. Oʻzbekiston shaharlari oʻrtasida yangi aviareyslar va temir yoʻl aloqa yoʻnalishlarini ochish boʻyicha choralar koʻrildi, baʼzi milliy bayramlarni nishonlash paytida kamida uch kundan iborat dam olish kunlari belgilanadi.

Shu bilan birga, senatorlar taʼkidlashicha, normativ-huquqiy hujjatlar ijrosi holatini tahlil qilish, Senatga yuridik va jismoniy shaxslardan tushgan murojaatlarni oʻrganish, ekspertlar va tadbirkorlik subyektlarining fikrlarini oʻrganish mamlakatda turizm sohasini tiklash boʻyicha chora-tadbirlar samaradorligini pasaytiradigan qator muammolar va kamchiliklar borligini koʻrsatdi.

Jumladan, davlat rahbari tomonidan qabul qilingan huquqiy hujjatlarning qoidalari oxirigacha ijro etilmagan, turistlar xavfsizligini taʼminlash tizimini joriy etish jarayoni lozim darajada amalga oshirilmagan, avia va temir yoʻl orqali tashish narxlari baland.

Muhokama chogʻida bozorda raqobat kuchayib borayotgan sharoitda turizm sohasini tiklash masalalari turistik xizmatlarni kengaytirishni talab qilishi ham taʼkidlandi. Hozirgi vaqtda xalqaro bozorlarda taklif qilinayotgan turizm turlari sust diversifikatsiya qilingan. Turizmning qator yoʻnalishlari, masalan, Luxury turizm, onlayn-turizm, ov turizm yoʻnalishi salohiyati toʻliq ishga solinmagan va umuman rivojlantirilmagan, tibbiyot turizmini targʻib qilish sohasida jiddiy siljish yoʻq. “All inclusive” kabi ommabop sayyohlik xizmatlari shakllaridan foydalanilmaydi.

Bundan tashqari, turizm sohasida kadrlar bilan ishlash sifatini oshirish muhimligi taʼkidlandi. 2019-2020 oʻquv yilida sohada yuqori malakali kadrlarning keskin yetishmasligi kuzatilganiga qaramay, turizm yoʻnalishidagi oliy oʻquv yurtlarini tugatgan bakalavriat bitiruvchilarining 37 foizi ish bilan taʼminlanmagan.

Shuningdek, biznes uchrashuvlar, reklama va press-turlar kabi mashhur shakl va usullardan foydalanishda yuzaga kelgan cheklovlar tufayli turizmni marketing orqali targʻib qilish strategiyasini tubdan qayta koʻrib chiqish talab etiladi.

Yuqoridagilardan kelib chiqib, senatorlar Vazirlar Mahkamasiga parlament soʻrovini yuborish toʻgʻrisida Senatning tegishli Qarorini qabul qildilar.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?