Foto: poytaxt YHXB

Toshkent shahri “Spark” va “Matiz” avtomashinalar ishtirokida yoʻl-transport hodisasi sodir boʻldi. Bu haqda poytaxt YHXB matbuot xizmati xabar bermoqda.

Qayd etilishicha, holat kecha, 10-oktyabr kuni soat 23:30 atrofida Olmazor tumani Nurafshon koʻchasida sodir boʻlgan.

20 yoshli I.T. “Matiz” avtomashinasida ketayotib rul boshqaruvini yoʻqotgan. Soʻngra yoʻl ajratuvchi beton toʻsiqqa urilib, 40 yoshli B.Q. boshqaruvidagi “Spark” avtomobili bilan toʻqnashgan.

YTH oqibatida “Spark” haydovchisi olgan jarohatlari tufayli voqea joyida vafot etgan. “Spark” ichida boʻlgan 2 nafar yoʻlovchiga hamda “Matiz” haydovchisiga birinchi yordam koʻrsatish maqsadida shifoxonaga olib ketilgan.

Holat yuzasidan Jinoyat kodeksining 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish odam oʻlimiga sabab boʻlsa) bilan jinoyat ishi qoʻzgʻatilgan. Hozirda tergov davom etmoqda.