Illyustrativ foto

Toshkent shahrida inson ruhiyatiga kuchli taʼsir qiluvchi moddalar mavjud boʻlgan dori vositalari savdosining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar qildi.

Maʼlum qilinishicha, Departamentning Chilonzor tumani boʻlimi tomonidan oʻtkazilgan tezkor tadbirda “D.G.” MCHJ dorixonasi sotuvchisi A.Oʻ. fuqaro Q.M.ga xorijda ishlab chiqarilgan 50 dona tarkibida kuchli taʼsir qiluvchi moddalar mavjud “Omnadren 250” nomli dori vositasini 3,2 million soʻmga shifokor retseptisiz sotgan vaqtida ashyoviy dalillar bilan ushlangan.

Boshqa bir holatda esa Departamentning Yakkasaroy tumani boʻlimi va DXX xodimlari hamkorligida oʻtkazilgan tezkor tadbirda fuqaro D.G. fuqaro A.T.ga 5 quti “Fit 90” nomli tarkibida kuchli taʼsir qiluvchi moddalar mavjud boʻlgan dori vositasini 500 ming soʻmga sotgan vaqtida ushlanib, undan turli nomdagi 13 quti tarkibida kuchli taʼsir qiluvchi moddalar mavjud boʻlgan dori vositalari ashyoviy dalil sifatida olingan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qoʻzgʻatilib, tergov harakatlari oʻtkazilmoqda.