Shu yilning 9-10-oktyabr kunlari Toshkentda ilk marotaba sportchilar va havaskorlar oʻrtasida “Asian Sprint Triathlon Cup”, yaʼni triatlon boʻyicha spring masofasida Osiyo kubogi oʻtkaziladi. Bu haqda poytaxtimizda boʻlib oʻtgan matbuot anjumanida Oʻzbekiston Milliy olimpiya qoʻmitasi raisi Rustam Shoabdurahmonov maʼlum qildi.

“Aslida ushbu musobaqa 2020-yilda oʻtkazilishi belgilangan edi. Biroq pandemiya sababli musobaqa kechiktirildi. Bu yilgi musobaqa Xalqaro triatlon federatsiyasi taqvimidan oʻrin olgan. Shuningdek, musobaqaga bir qator xorijiy davlatlardan delegatlar va xalqaro hakamlar jalb etilgan” — Oʻzbekiston triatlon federatsiyasi bosh kotibi Yelena Kun.

Taʼkidlanganidek, triatlon boʻyicha sprint masofasida Osiyo kubogi bahslarida ishtirokchilar 5 km. masofaga yugurish, velosipedda 20 km. masofaga poyga hamda ochiq havzada 750 metrga suzish boʻyicha oʻzaro musobaqalashadi.

Triatlon boʻyicha Osiyo kubogida Rossiya, Ukraina, Polsha, Chexiya, Slovakiya, Lyuksemburg, AQSH, Yaponiya, Marokash, Qozogʻiston va yurtimiz sportchilari gʻoliblik uchun bahs olib borishadi.

“Xalq soʻzi”.