Toshkentning Chilonzor tumanidagi dorixonalarda kuchli dori vositalarining noqonuniy savdosi aniqlandi. Bu haqda Toshkent shahar IIB xabar berdi.

Maʼlumotlarga koʻra, tuman dorixonalaridan birida 24 yoshli fuqaroning kuchli dori-darmonlarni noqonuniy sotish holatlari aniqlangan. Tekshiruv davomida ashyoviy dalil sifatida 957 ta “Zardeks” tabletkalari va 28 ta “Regapen” tabletkalari olingan.

Shuningdek, yana boshqa dorixonada 30 yoshli erkak giyohvand moddalarni noqonuniy sotish bilan shugʻullangan. Tekshiruv natijasida dorixonadan 78 ta “Zardeks” tabletkalari, 6 ta “Selofen” tabletkalari, 4 ta “Regapen” tabletkalari hamda bitta shisha “Tropikamid” topilgan va musodara qilingan.

Bundan tashqari, shunga oʻxshash faktlar Chilonzor tumanining 8 va 18 -kvartallarida joylashgan yana uchta dorixonada aniqlangan.

Aniqlangan faktlar asosida Jinoyat kodeksining 186-3-moddasi (Tarkibida kuchli moddalar boʻlgan retsept boʻyicha dori vositalarini chakana sotish tartibini buzish) boʻyicha jinoyat ishi qoʻzgʻatilgan. Hozirda tergov harakatlari olib borilmoqda.