Davlatobod tumanidagi viloyat madaniyat saroyi majlislar zalida xalq deputatlari Namangan shahar Kengashining navbatdan tashqari sessiyasi boʻlib oʻtdi.

Sessiya ishida Gʻofurjon Oribjonovich Jamolovni Namangan shahar hokimi etib tayinlash toʻgʻrisidagi viloyat hokimining qarori deputatlar eʼtiboriga havola etildi. Mazkur qaror deputatlarning ovoz berish natijalariga asosan tasdiqlandi.

Gʻofurjon Jamolov 1974-yilda Namangan shahrida tavallud topgan. Maʼlumoti oliy, 1997-yili Namangan sanoat texnologiya institutini, 2006-yili Oʻzbekiston Respublikasi Prezidenti huzuridagi Davlat boshqaruvi akademiyasini tamomlagan. Mutaxassisligi iqtisodchi-menejer.

Mehnat faoliyatini Namangan shahar hokimligida boshlagan. U 1997-2017-yillarda Namangan shahar va viloyat hokimliklari, Respublika Iqtisodiyot vazirligida turli masʼul lavozimlarida ish olib borgan. 2017-2020-yillarda Oʻzbekiston Respublikasi Uy-joy kommunal xizmat koʻrsatish vazirining oʻrinbosari lavozimida faoliyat yuritgan.

Gʻofurjon Jamolov 2020-yil noyabr oyidan buyon Toshkent shahar hokimining oʻrinbosari – poytaxt uy-joy kommunal xizmat koʻrsatish boshqarmasi boshligʻi lavozimida mehnat qilib kelayotgandi.