Ijtimoiy tarmoqlarda “Joriy yilning 10-noyabridan 21-noyabrigacha Qozogʻiston hududida hujjatlarsiz, yaʼni hujjati boʻlmagan yoki migratsiya qonunchiligini buzgan fuqarolarning tark etishi soʻraldi”, degan xabarlar tarqaldi. Natijada Qozogʻiston hududida ishlab yurgan oʻzbekistonliklar oʻrtasida turli tushunmovchiliklar yuzaga kelmoqda.

Tashqi mehnat migratsiyasi agentligi axborot xizmati ushbu xabarlar haqiqatga toʻgʻri kelmasligini maʼlum qildi.

Qayd etilishicha, Qozogʻiston Respublikasi hukumatining 2022-yil 31-dekabrdagi 1146-sonli qaroriga asosan, Oʻzbekiston Respublikasi fuqarolari Qozogʻiston Respublikasi davlat chegarasini kesib oʻtgan kundan boshlab, 30 kungacha boʻlib turishi mumkin. Ammo, umumiy boʻlish muddati 180 kalendar kuni davomida 90 kalendar kunidan koʻp boʻlmasligi kerak, yaʼni fuqaro uzluksiz 90 kalendar kunidan ortiq Qozogʻistonda boʻlib turishi mumkin emas.

Qozogʻistonga ishlash maqsadida borayotgan Oʻzbekiston fuqarolari 30 kun ichida ish beruvchi bilan mehnat shartnomasini tuzgach, ish beruvchi uni Xalqqa xizmat koʻrsatish markazida roʻyxatga kiritib, 3 oygacha boʻlgan muddatga ishlash va yashash uchun ruxsatnoma olish yoki salohiyatli ish beruvchilar tomonidan kvota asosida ishga jalb qilish tartibi mavjud.