2021-yil 9-iyulda Oliy Majlis Senati Raisi T. Narbayeva Rossiya Federatsiyasining Oʻzbekiston Respublikasidagi Favqulodda va Muxtor Elchisi O. Malginovni qabul qildi.

Uchrashuvda Oʻzbekiston-Rossiya munosabatlarining holati va rivojlanish istiqbollari, ikki tomonlama parlamentlararo hamkorlikni yana-da mustahkamlash, shuningdek, xalqaro parlament tuzilmalari doirasidagi oʻzaro hamkorlik masalalari muhokama qilindi.

Shuningdek, tomonlar Oʻzbekiston Respublikasi Oliy Majlisi Senati va Rossiya Federatsiyasi Federal Majlisining Federatsiya Kengashi oʻrtasidagi hamkorlik boʻyicha parlamentlararo komissiyaning samarali faoliyatini, ikkala mamlakat parlamentlarining oliy darajada savdo-iqtisodiy, investitsiyaviy, ilmiy-texnikaviy, madaniy-gumanitar sohalarda erishgan kelishuvlarni amaliyotga tatbiq etish boʻyicha oʻzaro hamkorligini taʼminlash hamda mintaqalar oʻrtasida toʻgʻridan-toʻgʻri aloqalarni faollashtirish muhimligini taʼkidladilar.

O.Malginov Prezident Sh.Mirziyoyev rahbarligida Oʻzbekistonda amalga oshirilayotgan, inson huquqlari va erkinliklarini taʼminlayotgan demokratik islohotlar va oʻzgarishlarni, ijtimoiy-iqtisodiy sohadagi jadal surʼtlarda yuz berayotgan ijobiy oʻzgarishlarni yuqori baholadi.