Butunjahon triatlon oilasi ayni kunlarda Tayvanda jam boʻldi. Ushbu davlatda 22-23-aprel kunlari “Challenge Taiwan” xalqaro musobaqasi boʻlib oʻtadi. Unda ishtirok etish uchun ushbu mamlakatga butun dunyodan umumiy hisobda 10 ming nafar mehmon tashrif buyurdi. Mazkur tadbirda Oʻzbekiston MOQ raisi maslahatchisi Alisher Karimov hamda Oʻzbekiston triatlon federatsiyasi bosh kotibi Yelena Kun ham ishtirok etishmoqda.

Ushbu xizmat safari orqali triatlon bellashuvlarini tashkil etish boʻyicha xalqaro tajribani oʻrganish koʻzlangan. Bugun Oʻzbekiston triatlon federatsiyasi aʼzolari “Challenge Family” brendi vakillari bilan musobaqa trassasi boʻylab barcha jarayonni oʻrganishdi. Ahamiyatlisi, turnir doirasida koʻrgazma nuqtalari ham tashkil etilgan boʻlib, unda joriy yilning sentabr oyida Samarqandda oʻtadigan “Challenge Samarkand” boʻlimi ham ochildi. Tadbir davomida boʻlim haqida qiziqish bildirgan mehmonlarga yurtimizning boy tarixi, musobaqaga koʻrilayotgan tayyorgarlik yuzasidan maʼlumot berildi.

22-23-aprel kunlari sportchilar medallar uchun kurash olib borishadi. Bahslar kattalar oʻrtasida quyidagi dasturlarda boʻlib oʻtadi:

Uzoq masofa: 3,8 km suzish, 180 km velopoyga, 42,2 km yugurish

Oʻrta masofa: 1,9 km suzish, 90 km velopoyga, 21,1 km yugurish

Olimpiya masofasi: 1,5 km suzish, 40 km velopoyga, 10 km yugurish.