Foto: Reuters (2015 yil)

Tayvanning sobiq prezidenti Ma Ying-Jou 1949-yildan beri materik Xitoyga tashrif buyurgan Tayvanning birinchi sobiq va amaldagi rahbari boʻldi.

2008 — 2016-yilgacha orol davlatining prezidenti boʻlgan Ma Ying-Jou Xitoyga safar qilganidan juda xursand va u yerda talabalar bilan suhbatlashishini va ota-bobolarining qabrlarini ziyorat qilishini maʼlum qildi.

Siyosatchi Nankin, Uxan, Chansha, Chunsin va Shanxay shaharlariga borishni rejalashtirgan. Ma Ying-Jouning ota-onasi Xitoyning markaziy Xunan provinsiyasida istiqomat qilgan. Shu bois u Syantan shahrida ajdodlari xotirasiga ehtirom marosimini oʻtkazmoqchi.

Shuningdek, administratsiya sobiq rahbari bir guruh tayvanlik talabalar bilan birgalikda Sinxay inqilobi (1911-1912) va Yaponiyaga qarshi qarshilik urushi (1931-1945) bilan bogʻliq boʻlgan bir qancha joylarga ham tashrif buyuradi. Bundan tashqari, sayohat davomida tayvanlik talabalar va materik Xitoy universitetlari talabalari oʻrtasida uchrashuv tashkil etilishi koʻzda tutilgan.

“Men ham Tayvan universitetlaridan talabalarni almashish dasturlarida qatnashish uchun materikka yuboraman”, dedi Ma va bunday harakatlar ikki davlat oʻrtasidagi munosabatlarni yaxshilashini qoʻshimcha qildi.

Maʼlumot oʻrnida aytib oʻtamiz, Tayvan 1949-yildan beri oʻz maʼmuriyati tomonidan boshqariladi. Oʻshanda Chan Kayshi (1887-1975) boshchiligidagi Gomindan qoʻshinlarining bir qismi Xitoy fuqarolar urushida magʻlubiyatga uchrab, bu yerga qochib oʻtgan edi. Orolda kommunistlar hokimiyatga kelishidan oldin materikda mavjud boʻlgan sobiq Xitoy Respublikasi bayrogʻi va boshqa atributlari saqlanib qolgan.

Avvalroq, Xitoy rahbari Si Szinpin Butunxitoy xalq vakillari kengashi birinchi sessiyasining yopilish marosimida Xitoy Tayvan bilan birlashish jarayonini izchil olgʻa siljitish niyatida ekanini maʼlum qilgan edi.

“Vatanni birlashtirish jarayonini izchil davom ettirish zarur”, degandi oʻshanda Szinpin.