Bosh prokuratura huzuridagi Departamentning Pastdargʻom tuman boʻlimi tomonidan gaz taʼminoti boʻlimi xodimlari bilan hamkorlikda oʻtkazilgan tergovga qadar tekshiruvda “O.S.” MCHJ rahbari O.A. oshxona binosida umumiy foydalanishdagi gaz tarmogʻiga oʻzboshimchalik bilan ulanib jami 269 mln soʻmlik tabiiy gazdan noqonuniy foydalanganligi aniqlangan.

Shu kabi, Departamentning Samarqand shahar va Urganch tuman boʻlimlari tomonidan ETK xodimlari bilan hamkorlikda oʻtkazilgan tergovga qadar tekshiruvlarda “K.U.” Oilaviy korxonasi va “U.X.” MCHJ masʼul shaxslari oshxona binosi va suv nasosini umumiy foydalanishdagi elektr tarmogʻiga oʻzboshimchalik bilan ulab jami 160,2 mln soʻmlik elektr energiyasidan noqonuniy foydalanganliklari aniqlangan.

Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qoʻzgʻatilib, tergov harakatlari oʻtkazilmoqda.