Foto: Surxondaryo viloyati YHXB

Surxondaryo viloyati Sariosiyo tumanida sodir boʻlgan yoʻl-transport hodisasida uch nafar yigit halok boʻlgan. Bu haqda viloyat IIB YHXB axborot xizmati xabar berdi.

Qayd etilishicha, hodisa 2024-yil 17-sentyabr kuni soat 03:15 larda M-41 avtomobil yoʻlining Sariosiyo tumani, Shabnam MFY hududidan oʻtuvchi qismida sodir boʻlgan. 2004-yilda tugʻilgan (haydovchilik guvohnomasiga ega boʻlmagan) yigit “Nexia-2”ni boshqarib kelib, qarama-qarshi tomondan kelayotgan 19 yoshli (haydovchilik guvohnomasiga ega boʻlmagan) haydovchi boshqaruvidagi “VAZ-2107” bilan toʻqnashgan.

Yoʻl-transport hodisasi oqibatida VAZ-2107 salonida boʻlgan 3 nafar yoʻlovchi (haydovchining sinfdoshlari) vafot etgan. Shuningdek, har ikkala mashinada boʻlgan boshqa yoʻlovchilar tan jarohati olib, tuman tibbiyot birlashmasiga murojaat qilgan.

Maʼlum qilinishicha, hozirda holat yuzasidan Sariosiyo tuman IIB Tergov guruhi tomonidan jinoyat ishi qoʻzgʻatilib, tergov harakatlari olib borilmoqda.