Foto: Xalq so‘zi

Sirdaryo viloyati tibbiy-ijtimoiy xizmatlarni rivojlantirish boshqarmasi tomonidan ehtiyojmand 86 nafar fuqaroga besh turdagi protez-ortopediya moslamalari yetkazib berildi.

Joriy yilning noyabr oyi holatiga koʻra, 51 dona kattalar uchun nogironlar aravasi, 24 dona eshitish moslamasi, 31 dona hassa, 7 juft qoʻltiq tayoq, 8 dona yurish moslamasi yetkazib berilgan boʻlsa, protez-ortopediya buyumlari uchun ehtiyoji boʻlgan yana 100 nafar muhtoj shaxslarning oʻlchamlari olinib, ularga sertifikat taqdim etildi.

— Ushbu ishlarni amalga oshirishimizda Sirdaryo viloyat hokimligi, viloyat prokuratura xodimlarining yordami katta boʻldi, — deydi Sirdaryo viloyat tibbiy-ijtimoiy xizmatlarni rivojlantirish boshqarmasi boshligʻi Akbarxon Mirzaxonov. — Bu mahsulotlarni olib kelish va fuqarolarga yetkazib berishimiz uchun mahalliy byudjetdan 200 million soʻm oʻtkazildi.

Darhaqiqat, Sirdaryo viloyatida tibbiy-ijtimoiy yordamga muhtoj, nogiron va yakka-yolgʻiz fuqarolarni qoʻllab-quvvatlash, ularga har tomonlama koʻmak koʻrsatish borasida sezilarli qadamlar tashlangan. Bu esa oʻsha toifadagi insonlarning yurtga va jamiyatga boʻlgan ishonchi yanada oshishiga xizmat qilmoqda.

Ahmadali SHERNAZAROV,  “Xalq soʻzi”.