Guliston shahrida Oʻzbekiston Respublikasi Davlat mustaqilligining 30 yilligi oldidan  hamda “Navroʻz” umumxalq bayrami munosabati bilan Sirdaryo viloyati hokimining farmoyishiga asosan eʼlon qilingan viloyat ijodkorlari oʻrtasida “Dunyolarga tanitamiz, Sirdaryoni!”, “Sir va moʻyqalam sehri” nomli ijodiy tanlovlar gʻoliblarini taqdirlash marosimi boʻlib oʻtdi.

“Dunyolarga tanitamiz, Sirdaryoni!” tanloviga 65 nafar ijodkor oʻzlarining soʻnggi 3 yilda yozgan badiiy ijod namunalarini taqdim etdi. Tanlov yakuniga koʻra ularning 9 nafari 3 ta yoʻnalish – nazm, nasr va publitsistika boʻyicha gʻolib deb topildi.

  Shu yil 17-mart kuni esa  Alisher Navoiy nomidagi viloyat  axborot-kutubxona markazining koʻrgazmalar zalida “Sir va moʻyqalam sehri” ochiq tanlovi ham  boʻlib oʻtdi. Unda poytaxtlik taniqli rassomlardan iborat hakamlar hayʼati 3 kun davomida ish olib borib,  257 nafar rassom ishidan eng  yuksak isteʼdod bilan chizilgan rasmlarni tanlab oldi va ularning 11 nafari yuqori oʻrin egasi  boʻldi. Eʼtiborlisi yana 57 nafar yosh musavvir ham gʻolib deb topildi va ularga  pul mukofotlari berildi. Bu hali hammasi emas.

Gap shundaki, turli ijodiy  yoʻnalishlarda namuna va faollik koʻrsatayotgan yana 55 nafar  ijodkor 2 million soʻmdan  pul mukofoti bilan ragʻbatlantirildi.

Taqdirlash tantanasida viloyat hokimi Gʻofurjon Mirzayev qatnashdi va barcha ijodkorlarni Navroʻz bayrami bilan tabrikladi.

Shuningdek unda tuman va shahar hokimlari ham ishtirok etdi.

Ahmadali SHERNAZAROV

“Xalq soʻzi”