Prezidentimizning 2021-yil 26-martdagi “Maʼnaviy-maʼrifiy ishlar tizimini tubdan takomillashtirish chora-tadbirlari toʻgʻrisida”gi qarorida maʼnaviy-maʼrifiy jarayonlarni tashkil etishda yaxlit tizim mavjud emasligi, xalqimiz, ayniqsa, yoshlarni maʼnaviy tahdidlardan himoya qilish borasida yetarli darajada tashkiliy-amaliy va ilmiy-tadqiqot ishlari olib borilmayotgani, ushbu yoʻnalishda davlat tashkilotlari, fuqarolik jamiyati institutlari, ommaviy axborot vositalari hamda xususiy sektorning ijtimoiy hamkorligi samarali yoʻlga qoʻyilmay kelayotgani bilan bogʻliq bir qancha kamchiliklar taʼkidlab oʻtildi.

Islom Karimov nomidagi Toshkent davlat texnika universiteti professori, siyosiy fanlar doktori Toʻlqin ALIMARDONOV bilan suhbatimiz ushbu qarorning maqsad-mohiyati va oldimizda turgan dolzarb vazifalar, ayrim muammolarning yechimlariga bagʻishlandi.

— Maʼnaviyat inson ruhiyati, milliy mansublik kodi, uning imon-eʼtiqodi, maqsad-muddaolari, irodasi, sadoqat toʻygʻusi, adolatli jamiyat toʻgʻrisidagi qarashlari ifodasidir, — deydi T. Alimardonov. — Maʼnaviy xavfsizlik masalasi millatning mavjudligini belgilovchi vazifalar qatoriga kiradi. U axloqiy qadriyatlar orqali jamiyat va uning madaniyatini saqlashga qaratilgan yaxlit ijtimoiy tizimlar faoliyatini namoyon etadi. Bu soha muntazam ravishda muolajaga muhtoj, deb oʻylaymiz. Shunday ekan, mazkur jarayonlarni ilmiy nuqtai-nazardan oʻrganmasdan, uning nazariy uslublarini tatbiq etmasdan mudom shakllanib kelayotgan jamiyat qarashlari yaxlitligini va islohotlar samaradorligini taʼminlab boʻlmaydi. Yuqoridagi qaror shu jihatdan muhim ahamiyat kasb qiladi.

— Bugun kishilik jamiyatida ijtimoiy oʻzgarishlar yangi tahdidlarni vujudga keltirmoqda. Xalqaro terrorizm, mafkuraviy xurujlar, aqidaparastlik, turli OAV taʼsiri, ijtimoiy-psixologik koʻrinishdagi tahdidlar shular jumlasidan. Tashqi tahdidlar taʼsiri odamlarning oʻzaro aloqalarida, ijtimoiy faoliyati va kayfiyatida, xatti-harakati, eʼtiqodi, maslak va dunyoqarashida muayyan ijtimoiy-maʼnaviy munosabatlar bilan bogʻliq ichki tahdidlarni paydo qilmoqda. Bu masalaga qanday qaraysiz?

— Birinchi holatda tashqi tahdidlardan saqlanish harbiy mudofaaga asoslangan, ikkinchi holatda davlatning ijtimoiy-maʼnaviy munosabatlar tizimini rivojlantirish jamiyat barqarorligini taʼminlashga xizmat qiladi. Bilasizmi, hozirga qadar jamiyat xavfsizligi deyilganda, tashqi harbiy tahdid yoki jamiyat hayotini izdan chiqarishi mumkin boʻlgan tabiiy ofatlar tushunilgan. Bugungi kunda xavfsizlik turlari iqtisodiy, ijtimoiy, ekologik, harbiy, siyosiy, informatsion, gumanitar sohalarga boʻlinib ketdi. Shu jihatdan olib qarasak, hozirda gumanitar xavfsizlikning ahamiyati ortib bormoqda. Chunki gumanitar xavfsizlik aholi salomatligi, inson hayoti muhofazasi, demografik, etnik, diniy, konfessional, millatning maʼnaviy salohiyati, ayniqsa, yoshlar tarbiyasini qamrab oladi. Ushbu sohalarning izchil va davr daʼvatlariga hamohang rivojlantirilishi gumanitar xavfsizlik va oʻz oʻrnida davlat yaxlitligini taʼminlash imkoniyatlarini kengaytirib boradi.

Informatsion texnokratik rivojlangan jamiyatga oʻtish, bu — eskilik bilan yangilik oʻrtasidagi toʻqnashuv, moddiy imkoniyatlarning maʼnaviy olam bilan yuzaga keladigan ziddiyatlar sirasiga kiradi. Shu ziddiyatlar silsilasida yoshlarning jamiyat hayotida oʻz oʻrnini topib olishi, uning faol ishtirokchisiga aylanishi barqarorlikning muhim omillaridan boʻlib sanaladi. Bu ziddiyatlar, bir tomondan, yoshlarning ijodiy intellektual salohiyatining oʻsishi, oʻzligini anglashga boʻlgan intilishi boʻlsa, ikkinchi tomondan, moddiy imkoniyatlarga intilish orqali milliy-madaniy qadriyatlar oraligʻida egotsentirizmning kuchayib borishi va jamiyatda ijtimoiy-psixologik muhitning taranglashuvida namoyon boʻladi. Shu tariqa yoshlar ikki olam oʻrtasida — axloqiy mezonlar tanlovida qoviriladi va oʻz “men”ini doimo izlaydi.

— Yoshlarimizning maʼnaviy dunyosi, tafakkuri darajasi dunyoda kechayotgan globallashuv shiddati oldida orqada qolayotgani rostmi? Bu borada taʼlim tizimida qanday usul va shakllarni kuchaytirish lozim?

— Fikringizda jon bor. Maʼnaviy olami boʻlmagan yosh yigit-oʻsmir jamiyatda erki va qadr-qimmatini yoʻqotadi, bunday kishi inqirozga, soʻngra ruhiy yemirilish holatiga uchraydi. Bu holat uning mehnat faoliyatiga, ayni paytda, ijtimoiy munosabatlariga ham koʻchib oʻtadi. Natijada ijtimoiy munosabatlar riyokorlikka, ikkiyuzlamachilikka, rasmiy qarorlarning suiisteʼmol boʻlishiga olib keladi. Yoshlar mavjud axloqiy qadriyatlardan koʻra, jamiyatning real munosabatlariga intilish orqali oʻz “men”ini himoya etishga intiladi. Bu, oʻz oʻrnida, yoshlarning axloqiy-psixologik qiyofasiga, jamiyatda maʼnaviy jarayonlar rivojiga salbiy taʼsir etmay qolmaydi. Natija vujudga kelgan boʻshliqda buzgʻunchi kuchlar oʻz maqsadlarini OAV va yangi axborot kommunikatsiya tarmoqlari orqali yoshlar ongiga singdirishga oshiqadi.

Soʻnggi yillarda milliy xavfsizlikni taʼminlashga qaratilgan chora-tadbirlar izchil maʼnaviy tizimga aylanayotganini taʼkidlash lozim. Mazkur tadbirlar barqaror ijtimoiy munosabatlar rivojini taʼminlovchi barometr sifatida yoshlar faoliyatini yana-da jonlantirish vazifalarini oʻz ichiga qamrab olgani bilan samarali natijalarni bermoqda.

Bugungi kunda 2016-yil 14-sentyabrdagi “Yoshlarga oid davlat siyosati toʻgʻrisida”gi Oʻzbekiston Respublikasi Qonuniga muvofiq, yigit-qizlarga belgilangan tartibda mukofotlar, stipendiyalar, taʼlim grantlari taqdim etish, iqtidorli va isteʼdodli yoshlarni aniqlash maqsadida tanlovlar, olimpiadalar, koʻrgazmalar tashkil etish, ularni xorijiy mamlakatlarda oʻqitish, qayta tayyorlash va amaliyotni oʻtash dasturlaridan tanlov asosida foydalanishini taʼminlashning uch bosqichli tizimi amal qilmoqda. Maʼnaviy tizimning zamonaviy ehtiyojlarini ifoda etuvchi shakl va usullar sifatida “Har bir tadbirkor — yoshlarga madadkor” Yoshlar kichik sanoat zonalari, “Yosh tadbirkorlar” kovorking-markazlari, “Yoshlar mehnat guzari” komplekslari, “Loyihalar fabrikasi”, “Yoshlar murojaati” elektron platformasi faoliyati, “Oilaviy tadbirkorlikni rivojlantirish” dasturi, “Bir million dasturchi” loyihasi, Prezidentimizning besh muhim tashabbusi, “Yoshlar — kelajagimiz” jamgʻarmasi, “Bir tadbirkor + bir yosh” “Yoshlar daftari” kabi ragʻbatlantiruvchi texnologiyalar samarali natijalarini berib kelmoqda.

— Gap yoshlar maʼnaviyatini sifat jihatdan yuqori pogʻonaga koʻtarish haqida ketayotgan ekan, yana qanday ishlar oldimizda turibdi?

— Qarordagi tanqidiy xulosalardan kelib chiqib aytish mumkinki, jamiyatning maʼnaviy jarayonlari muayyan yaxlit tizimga boʻysundirilmagan. Ular aksariyat hollarda ayrim tashkilot va muassasalarning alohida hamda ayrim mavsumiy vazifalari doirasida shakllanib kelmoqda. Vaholanki, qarorda oila va jamiyat tashkilotlarining, soha yoʻnalishlaridan qatʼi nazar, umummilliy majburiyatga aylanishi lozimligi belgilanadi.

Navbatdagi muhim ishlardan biri rivojlangan jamiyatlarda boʻlganidek, maʼnaviy xavfsizlikni taʼminlash konsepsiyasini qabul qilish lozim. Mamlakatimizda shu yoʻnalishdagi davlat siyosatini belgilashga qaratilgan huquqiy asos, bu — “Oʻzbekiston Respublikasining maʼnaviy xavfsizligini taʼminlash konsepsiyasi” boʻlishi mumkin. Mazkur konsepsiya rasmiy ravishda tasdiqlangan maʼrifiy-madaniy tamoyillar, iqtisodiy va strategik yoʻnalishlar mohiyati, zamonaviy Oʻzbekiston jamiyatining rivojlanish maqsadlarini belgilaydigan siyosiy nuqtayi nazar, axborot, psixologik, mafkuraviy va diniy sohalar faoliyatini qamrab oladi. Boshqacha aytganda, jamiyatda nima uyat, milliy qadriyatga begona, degan mezonlar belgilanadi. Bu mezonlar universal tamoyillar sifatida sanʼat, adabiyot, musiqa va teatr sohalarida barcha amal qilishi lozim boʻlgan qadriyatlarni singdirishga hamda targʻibot qilishga xizmat qiladi. Maʼnaviyatimizga yot “madaniyat”larning kirib kelishini cheklaydi, nazorat qiladi, toʻsiq boʻladi. Ushbu tizim jamiyatda saqlanib kelayotgan zararli illatlar va tahdidlarni siqib chiqaruvchi mafkuraviy immunitet qobigʻini yaratishga qaratiladi.

Konsepsiya doirasida ilm-fan, rassomlar, adiblar, anʼanaviy diniy tashkilotlar vakillari jamoat birlashmalari tarkibida vatanparvarlik harakatini tashkil etish muhim, deb hisoblaymiz. Jamoat tashkilotlari faoliyatida tarqoqlik koʻzga tashlanib turibdi, deya qarorda bu masalaga alohida urgʻu berilgan. Ularning umummilliy harakatni vujudga keltirish imkoniyatlaridan yetarlicha foydalanilmay kelinmoqda. Binobarin, maʼnaviy xavfsizlikni taʼminlash sohasida, xususan, gʻayriijtimoiy fenomenlar — terrorizm, ekstremizm, turli mazhablararo kurashga qarshi turuvchi mutaxassislarni tayyorlash va jalb etish mumkin. Albatta, bu borada davlat tomonidan konfessiyaviy munosabatlar sohasida axloqiy prinsiplarni aniqlash, halokatli diniy va dunyoviy mafkuralarga qarshi tashviqot-targʻibot texnologiyalarini yaratishda ilmiy markazlar faoliyatini tashkil etishga zarurat tugʻiladi. Masalan, birgina Rossiyada yuzlab shunday ilmiy markazlar faoliyat yuritayotganini bilamiz. Shunday ekan, davlat organlari va fuqarolik jamiyati institutlari jamoat hayotining diniy, axborot, ilmiy-madaniy sohalaridagi buzgʻunchilik tendensiyalarining oldini olish, shuningdek, ushbu faoliyat ustidan nazoratni tashkil etish sohasidagi vakolatlarini aniqlash va qonuniylashtirish davrning taqozosiga aylangan.

— Bugun oliy taʼlim tizimi oldida maʼnaviy xavfsizlikka hissa qoʻshish borasida qanday vazifalar turibdi?

— Menimcha, ijtimoiy fanlardan maqsadli foydalanish tartiblari va uning mafkuraviy-tarbiyaviy yukini aniq belgilash masalasi qayta koʻrib chiqishni taqozo qilmoqda. Vaholanki, har bitta ijtimoiy kafedra biz taklif etgan kuchli markaz vazifasini bajarishi ham mumkin. Aslida, bu fanlarning missiyasi ham maʼnaviy qadriyatlarimizni — insonni tazyiqlardan himoyalash, yoshlar dunyoqarashini shakllantirish va zararli yot gʻoyalarning taʼsiriga berilishidan saqlashdan iborat.

Ijtimoiy fanlar tematika mavzulari zamon daʼvatlari, yoshlarning ijtimoiy ehtiyoji asoslarida kafedralar tomonidan shakllantirilsa, muntazam ravishda dolzarb mafkuraviy masalalarda tegishli mutaxassislar jalb etish amaliyoti joriy etilsa, qotib qolgan dastur va fikrlar bilan yoshlarni bezdirish tajribasidan uzoqlashgan boʻlar edik.

Bugun yoshlar ongiga ijtimoiy ahamiyatini yoʻqotgan maʼlumotlarni singdirishga urinish uslublari allaqachon muddatini oʻtab boʻlgan amaliyot. Mafkuraviy va gʻoyaviy taʼlimotlarga asoslangan fanlar mohiyatan tezkor, yoshlarni oʻzgaruvchan jarayonlarning ishtirokchisiga aylantirishiga xizmat qilsin. Oʻtib boʻlgan ijtimoiy munosabatlar bayonini taʼkidlash va takrorlash bugungi yoshlarni qiziqtirmaydi. Ijtimoiy fanlarning missiyasi “Nima qilmoq kerak?” “Qanday qilsa, toʻgʻri boʻladi?” degan davr daʼvatlariga javob berishi bilan yoshlarning maʼnaviy orinterini belgilab chiqarmogʻi lozim. Holbuki, yuqoridan belgilanayotgan fan dasturlari bugungi yoshlar maʼnaviy hayoti ehtiyojlarini ifodalay olmayapti. Bunda samarali va taʼsirchan targʻibot texnologiyalari hamda usullarini ishlab chiqish, xorijiy tajribani oʻrganish, shuningdek, bugungi mafkuraviy jarayonlarni ilmiy-amaliy jihatdan atroflicha tahlil qilib borish, alohida individual yondashuvlarni talab qiladi.

Shaxs ongiga singdirilishi lozim boʻlgan taʼlimning defferensiyasi hanuzgacha ishlab chiqilmagan. Bogʻchada, maktabda, oliy oʻquv yurtida, jamiyatda inson qanday maʼlumotlarni, qanday tartib va ketma-ketlikda hazm qilishi lozim? Binobarin, takrorlanib kelayotgan ijtimoiy fanlar mavzulari maqsadli ravishda tartibga solingan emas, faqat qisqartirilgan, xolos. Boz ustiga, ularning soni ham, sifati ham samaradorlik maqsadlariga boʻysuntirilmagan.

Tarbiya va tarbiyalanuvchilar oʻrtasidagi maʼnaviy uslublar metodologiyasini belgilab olish ham nihoyatda muhim masala hisoblanadi. Aslida metodologiya belgilanayotgan maqsadlarga qarab shakllantiriladi. Subyekt va obyekt oʻrtasida qanday majburiyat hamda vakolatlar mavjud? Biz istayotgan qadriyatlar pirovard natijalari qanday maqsadlarga qaratilgan? Har bir jamoada maʼrifatga intilish — mehnat qadri, salohiyat eʼtirofi, vatanparvarlik, sadoqat, halollik, adolat va jasorat tuygʻularini ragʻbatlantiruvchi omillar yaratilganmi? Bu masalalar faqat taʼlimning tarbiya bilan uygʻunligida oʻz ifodasini topadi. Yaʼni taʼlimning tarkibida tarbiya jarayonlari shakllantirilishi, turli fanlarni oʻqitish asnosida uning inson, millat, Vatan uchun muhim ahamiyatini ochib berishga qaratilgan kirish qismi bilan oʻquv dasturlar tuzilishi kerak, deb hisoblaymiz.

Maʼnaviy-axloqiy muammolarni hal qilishning yechimlaridan biri, bu — barkamol shaxsni voyaga yetkazishga qaratilgan tashkiliy va boshqaruv vazifalarning huquqiy asoslarini takomillashtirish bilan bogʻliq kechadi. Belgilangan tadbirlar, avvalo, inson oʻz faoliyati va qaroriga masʼul, erkin, tashabbuskor, yetakchi, ishlab chiqaruvchi subyekt sifatidagi rolini oshirishga xizmat qiladi. Bu insonning his-tuygʻulari, manfaatlari, ehtiyojlari, bilimlari, eʼtiqodi, faoliyat motivlari, intilishlari, axloqiy tarbiyasi, xarakterini shakllantirish orqali maʼnaviy jasoratga yoʻl ochadi.

Bu borada taʼlim-tarbiya tizimi samaradorligini oshirish, uning uzviy va uygʻunligini taʼminlash, noanʼanaviy tajribalarni joriy etish kun tartibida turibdi. Qarorda belgilangan vazifalar qatorida mazkur yoʻnalishdagi ishlar koʻlamini oila, mahalla, ishlab chiqarish tashkilotlari hamkorligini kengaytirishga, ayni paytda, layoqatli mutaxassislar bilan taʼminlashga alohida eʼtibor qaratiladi. Bunday vazifa taʼlim tizimida nafaqat gʻoyaviy va moliyaviy, balki zamonaviy tashkiliy-strukturaviy tuzilmalarni oʻzgartirishni talab etadi.

— Islohotlarning amaliy natijalari sifatida aytish lozimki, aksariyat yoshlarimiz kechagi kunga nisbatan bugun ancha faol, mustaqil fikrlashga, masʼuliyat hamda majburiyatlarini oʻz zimmasiga olishdan choʻchimaydigan, ilmiy va amaliy takliflari bilan jamiyat hayotiga ishtirok etishga moyil, baʼzida qiziqqon, ichidagi gapini demokratlarcha betingizga aytib qoʻyadigan...

– Toʻgʻri anglabsiz, yoshlarimiz zamonga moslashishga, oʻz ideali, maqsadlari uchun intilishga harakat qilmoqda. Bu pozitiv holat. Ular jahonda mavjud boʻlgan deyarli barcha texnika, texnologiya va fan sirlarini egallab kelmoqdalar. Kompyuter va boshqa texnika dastgohlar ular uchun kundalik ehtiyojga aylangan. Kecha kollejni tamomlagan yoshlar zamonaviy ishlab chiqarish texnologiya va uskunalarida koʻzni quvontiradigan mashinalar hamda turli-tuman maishiy anjomlar ishlab chiqarishmoqda. Ochigʻini aytsam, ulardan orqada qolmaslik, zamon talablariga mos qadam tashlash uchun yaqinroq boʻlishga intilaman. Ularning dunyoqarashi zamon va makon bilan hamnafas. Shiddat bilan oʻzgarib borayotgan jarayonlar sohibi, goʻyoki otga minib jilovlab olganday sergak, ishonch bilan istagan madaniyat va tildagi odamlar bilan xohlagan mavzuda suhbat olib boradilar. Ular bizlarga oʻxshab vaqtlarini tavoze qilishga, xushomad soʻzlarni ishlatishga, yana kimlarningdir qovogʻiga qarab, iltifot koʻrsatishni kutishga toqati yoʻq. Ortiqcha tanbehlar ular uchun dastak bilan teng, darrov javobini qaytaradi. Yoshlarning vaqti tigʻiz. Ertalab oʻqish, tushda mashgʻulot, tush oʻrtasida til oʻrganishga boradi, kechqurun chizmakashlik, oʻn ikkidan keyin yozma ishni toʻldirish, tong azonda ishlaydi va yana oʻqiydi. Muhabbat, ishq masalalari maxsus kun tartibiga kiritilmagan, balki ular mehnat jarayonlari bilan uygʻunlashib ketgan. Aslida, yoshlarning shunday shijoatga toʻla ishtiyoqi yuksalayotgan millatning rivojidan dalolat beradi.

— Suhbatimiz mavzusidan kelib chiqib, maʼnaviyat va iqtisodiyotning oʻzaro aloqadorligi toʻgʻrisidagi fikringizni ham bildirib oʻtsangiz.

— Siyosat ham, iqtisod ham mazmun-mohiyati bilan maʼnaviy-axloqiy qadriyatlar negizida amalda taʼminlanadi. Maʼnaviyatni iqtisoddan, iqtisodni maʼnaviyatdan ayro qarab boʻlmaydi. Ijtimoiy-iqtisodiy yoʻnalishlarda amalga oshirilayotgan oʻzgarishlar, birinchi galda bozor munosabatlariga oʻtish jarayonlarining murakkabligi, aholining mulkiy tabaqalanishi, yangi ijtimoiy talab va ehtiyojlarning oʻsib borishi muvozanatga olinmas ekan, u yoki bu darajada maʼnaviy qadriyatlarga putur yetkazilishi baravarida, ishlab chiqarish munosabatlariga, demakki, jamiyat hayotiga oʻzining salbiy taʼsirini koʻrsatadi.

Jamiyatda maʼnaviy ruhiyat oʻzgaradi, ijtimoiy bosim ortadi, bagʻrikenglik oʻrnini gʻazab, alamzadalik, begonalashuv tuygʻulari egallaydi, nosogʻlom raqobat yuzaga keladi. Mavjud qadriyat va manfaatlarning oʻzgarishi, eskilik va yangilik oʻrtasidagi ziddiyat, tasavvur va qarashlarning yemirilishi, oʻzlikni anglash, milliy meros va madaniyatlarni tiklash, jamiyat ongiga singdirish, oʻtmishdan meros dogmatik kayfiyatlar oʻrtasida qarama-qarshiliklar mavjud boʻladiki, ular izchil maʼnaviy tizim faoliyati bilan bartaraf etib boriladi. Yaʼni maʼnaviyat ishlab chiqarish munosabatlarining tarkibiga aylanmogʻi, barcha sohada ishlab chiqarish meʼyorlari maʼnaviy qadriyatlar negizida qurilmogʻi va unda inson qadr-qimmati ustuvorligi taʼminlanmogʻi lozim.

Demak, jamiyat xavfsizligini taʼminlash borasida davlat rolining oshib borishi uchun jamiyat institutlari, turli ijtimoiy guruhlar, qatlamlar nafaqat himoyaga muhtoj obyekt, balki milliy xavfsizlikni taʼminlovchi subyekt boʻlib ham maydonga chiqishi lozim. Fuqarolarni yagona maqsad atrofida jipslashtirish, umummanfaat yoʻlida safarbar etish jamoat tashkilotlarining ustuvor vazifasi hisoblanadi. Ayni paytda, bunday yondashuv jamoat tashkilotlari bilan davlat organlari oʻrtasidagi munosabatlarni muvofiqlashtirish millatning maʼnaviy negizini hosil qiladi. Shu yaxlitlikka intilish barcha fuqaroning burchiga aylanadi va masʼuliyat tuygʻusini shakllantiradi.

Mazkur vazifalar koʻlami 2021-yil 4-martida qabul qilingan “2021 — 2025-yillarda fuqarolik jamiyatini rivojlantirish konsepsiyasini tasdiqlash toʻgʻrisida”gi Prezident Farmonida belgilab berildi. Jamiyatda soʻz erkinligi, eʼtiqod erkinligi, fuqarolar xavfsizligi, sogʻlom raqobat muhiti, javobgarlik masʼuliyati siyosiy institutlarning qonunlar asosidagi faoliyati bilan taʼminlanadi. Ikkinchi tarafdan, aholining real ehtiyojlarini qondirishga qaratilgan milliy taʼlim, sogʻliqni saqlash, madaniyat va ijtimoiy sohalarning samaradorligi maʼnaviy xavfsizlikning raqobatbardosh omillariga aylanadi.

Bu yoʻnalishlarda davlat maʼnaviy-axloqiy qadriyatlar orqali fuqarolarning istiqbolli maqsadlariga yoʻl ochib boradi. Davlat yaxlitligini saqlash, ijtimoiy-siyosiy faoliyatini takomillashtirish, turli qusurlar-balolardan himoyalash milliy xavfsizlikning kafolati boʻla oladi. Davlatchilik va uning qonuniy vakolatlarini asrash ham fuqarolik majburiyatlarimiz qatoriga kiradi. Hozirgi paytda odamlarda shukronalik toʻygʻusi, oʻtish davri qiyinchiliklariga sabr-toqatli boʻlish, har qanday holatda vatanning muqaddasligini inkor etmaslik, davlat mustaqilligi va uning daxlsizligini asrab-avaylash Oʻzbekiston fuqarolarining muqaddas burchi ekanligi barcha tarbiyaviy maqsadlarimizning asosiga aylanmogʻini istardik.

Xulosa shuki, globallashuv sharoitida madaniy integratsion jarayonlar rivoji va “ommaviy madaniyat” unsurlari tashvishli va tahdidli holatga aylandi. Jahonning ayrim davlatlari va mintaqalarida sodir boʻlayotgan ijtimoiy-siyosiy jarayonlarning keskinlashuvi, hatto Gʻarb davlatlarida ijtimoiy inqirozlarning vujudga kelishi, pandemiyaning turli asoratlarini tahlil qilish xalqlarning maʼnaviy qadriyatlarini begona tahdidlardan saqlashga doir yondashuvlarni takomillashtirish va puxta tizimga keltirishni taqozo etmoqda. Bunday zamonaviy konsepsiya va mustahkam tizim yaratilishi Oʻzbekistonning yaxlitligi va kelajak avlodiga asosiy kafolat boʻlib xizmat qiladi. Zero, maʼnaviy xavfsizlik — milliy barqarorlik omilidir.

Baxtiyor OMONOV suhbatlashdi