Oʻzbekiston elchixonasi tomonidan Shanxay hamkorlik tashkiloti Kotibiyatida mamlakatimizdagi konstitutsiyaviy islohotlarga bagʻishlangan brifing uyushtirildi.

Tadbirda Xitoy Tashqi ishlar vazirligi masʼullari, SHHT Kotibiyati rahbariyati, SHHT davlatlari elchilari va diplomatlari, hamda aʼzo davlatlarning doimiy vakillari ishtirok etdi.

Ishtirokchilarga Oʻzbekistonda konstitutsiyaviy islohot, oʻzgartish va qoʻshimchalar kiritilayotgan Konstitutsiya toʻgʻrisida batafsil axborot berildi.

Konstitutsiyaviy islohotda dunyoning deyarli barcha mamlakatlari, xususan SHHT davlatlari konstitutsiyalari atroflicha oʻrganilgani qayd etildi.

Mazkur jarayonda inson huquq va erkinliklarini taʼminlash – davlatning oliy majburiyati sifatida muhrlab qoʻyilishi, loyihada “Inson-Jamiyat-Davlat” tamoyili bosh mezonga aylanib, inson huquqlari borasidagi normalar 3,5 baravarga, davlatning ijtimoiy majburiyatlariga doir normalar uch barobarga oshganligi, Oʻzbekiston ijtimoiy davlat degan tamoyil konstitutsiyaviy tarzda belgilanayotganiga eʼtibor qaratildi.

Shuningdek, yoshlar va taʼlimni, gender tenglikni, tadbirkorlik faoliyatini qoʻllab-quvvatlash, erkin axborot olish, ijtimoiy himoya va ekologik huquqlarni, sud tizimlari erkinligi va mustaqilligini taʼminlash, Parlament vakolatlarini yanada kuchaytirish borasidagi yangi oʻzgarishlar alohida qayd etildi.