Oʻzbekiston Respublikasi Prezidenti Shavkat Mirziyoyev bugun Shanxay hamkorlik tashkilotiga aʼzo davlatlar rahbarlari kengashining videoanjuman shaklida boʻlib oʻtgan sammitidagi nutqida xalqaro va mintaqa kun tartibida turgan qator dolzarb masalalar qatori Qirgʻiziston Respublikasida siyosiy holat va Qorabogʻ masalasiga ham toʻxtalib oʻtdi.

"Hurmatli Sadir Nurxojoyevich Japarovning sammitimizda koʻrib turganimdan mamnunman, — dedi davlat rahbari. — Oʻzbekiston eng yaqin qoʻshni va strategik sherik sifatida qardosh Qirgʻiziston xalqini tinch taraqqiyot va farovonlik sari intilishini har tomonlama qoʻllab-quvvatlaydi.

Shuningdek, Togʻli Qorabogʻ mojarosi hududidagi oʻt ochish va barcha harbiy harakatlarni butunlay toʻxtatish toʻgʻrisida Rossiya Federatsiyasining faol koʻmagida erishilgan kelishuvlarni olqishlaymiz. Ushbu hududda tinch hayot va barqarorlik tez fursatda tiklanishiga umid bildiramiz".