Foto: Xalq so‘zi

Prezidentimizning 2022-yil 21-iyundagi “Pedagogik taʼlim sifatini oshirish va pedagog kadrlar tayyorlovchi oliy taʼlim muassasalari faoliyatini yanada rivojlantirish chora-tadbirlari toʻgʻrisida”gi farmoni asosida Qarshi davlat universitetining Pedagogika instituti negizida Shahrisabz davlat pedagogika instituti tashkil etildi.

— Farmonga binoan yangi tashkil etilgan Shahrisabz davlat pedagogika institutining 2023-2026-yillarda rivojlantirishning maqsadli koʻrsatkichlari belgilangan, — deydi institutning tillar fakulteti dekani Ahadxon Muhammadiyev. — Unga koʻra, chet tili fanidan milliy yoki unga mos darajadagi xalqaro sertifikatga ega professor-oʻqituvchi va talabalar ulushini oshirish, yuqori malakali ilmiy va ilmiy-pedagog kadrlar tayyorlash, professor oʻqituvchilarning ilmiy-uslubiy faoliyati natijadorligini oshirish boʻyicha samarali faoliyat olib boramiz.

5-sentyabr kuni oliy taʼlim muassasasida 2022-2023 oʻquv yili boshlanishiga bagʻishlangan “Yangi Oʻzbekistonda el aziz, inson aziz” nomli maʼnaviy-maʼrifiy tadbir boʻlib oʻtdi va unda oʻqituvchilar talabalarni mustaqilligimizning 31 yilligi va yangi oʻquv yili bilan samimiy tabrikladilar. Dastlabki saboqlar “Mustaqillik darsi” bilan boshlandi. .

Eslatib oʻtamiz: institutda 1429 nafar talaba tahsil olayotgan boʻlsa, ularning 962 nafari kunduzgi bakalavr va 460 nafari sirtqi taʼlim yoʻnalishida oʻqishmoqda.

Faxriddin BOZOROV, “Xalq soʻzi”.