Foto: Xalq so‘zi

Samarqand shahrida aholiga koʻrsatilayotgan transport xizmatlari sifatini oshirish, yoʻlovchilarga qoʻshimcha qulayliklar yaratish, shahar jamoat transporti tizimini takomillashtirish boʻyicha zarur choralar koʻrilyapti. Xususan, viloyatda yoʻlovchi tashish faoliyati bilan shugʻullanuvchi tadbirkorlik subyektlari tomonidan harakat tarkibini yangilagan holda yoʻlovchilarga qulay va xavfsiz xizmat koʻrsatishni tashkil etish masalasiga alohida eʼtibor qaratilmoqda.

Avval xabar qilganidek, ana shu maqsadda “Maroqand trans 777» MCHJ Xitoy Xalq Respublikasining “King Long” avtozavodi bilan 80 dona avtobus sotib olish boʻyicha kelishuvga erishgan va ushbu avtobuslarning dastlabki 20 tasi Samarqand shahriga olib kelingan edi.

Yangi avtobuslar bugun, yaʼni 23-noyabrdan boshlab sinov tariqasida Samarqand shahrida uchta yoʻnalishda yoʻlovchilarga xizmat koʻrsata boshladi. Shunday qilib, “Temiryoʻl vokzali - Samarqand xalqaro aeroporti”, “Doʻstlik mahallasi - Boqiy shahar” hamda “Toshkent” MFY - Yangiobod qoʻrgʻoni – Qorasuv massivi» yoʻnalishlarida qatnov namunali yoʻlga qoʻyildi.

Abdulaziz Yoʻldoshev, “Xalq soʻzi”.