Samarqand viloyatida qalbaki aksiz markali alkogol hamda hujjatsiz tamaki mahsulotlarini sotish bilan shugʻullangan tadbirkorlik subyektlari aniqlandi. Bosh prokuratura huzuridagi Departamentning Samarqand shahri boʻlimi, IIB va bojxona boshqarmasi xodimlari hamkorligida oʻtkazilgan tezkor tadbirda “S.-Sh.” MCHJga qarashli savdo doʻkonlarida yirik hajmdagi noqonuniy tovarlar saqlanayotgani maʼlum boʻldi.

Tekshiruv davomida 77 turdagi 2 ming 637 dona qalbaki aksiz markali alkogol mahsulotlari hamda 69 turdagi 3 ming 899 quti tamaki mahsulotlari sotuvga qoʻyilgani aniqlandi. Mazkur mahsulotlar isteʼmolga yaroqsiz boʻlib, ularning umumiy bahosi 147,2 million soʻmni tashkil etgan. Barcha mahsulotlar ashyoviy dalil sifatida olindi va tegishli tartibda rasmiylashtirildi.

Shuningdek, Nurobod va Payariq tumanlarida ham tezkor tadbirlar oʻtkazilib, “S.S.” MCHJ rahbari S.Sh. va “A.O.” oilaviy korxonasi rahbari R.F. savdo doʻkonlarida sifatini tasdiqlovchi hujjatlari boʻlmagan mahsulotlarni sotish bilan shugʻullanayotgani fosh etildi. Ularning doʻkonlarida 142 turdagi 3 ming 285 dona qalbaki aksiz markali alkogol va 292 quti tamaki mahsulotlari savdoga qoʻyilgani maʼlum boʻldi.

Barcha holatlar boʻyicha Jinoyat kodeksining tegishli moddalari asosida jinoyat ishlari qoʻzgʻatildi va tergov harakatlari olib borilmoqda. Huquq-tartibot organlari bunday holatlarning oldini olish uchun nazoratni kuchaytirgan.