Foto: Xalq so‘zi

Samarqandda “Prezident archasi” tantanalari viloyat markazidagi Alisher Navoiy koʻchasidan boshlandi. Rang-barang chiroqlar bilan bezatilgan bayram archalari atrofida ertak qahramonlari ishtirokida teatrlashtirilgan tomoshalar, konsert dasturlari namoyish etilmoqda.

Samarqand shahridagi “Sadaf” tantanalar uyida bayram dasturxoni yozilib, oilaviy bolalar uylari, SOS mahallasi tarbiyalanuvchilari, boquvchisini yoʻqotgan oʻgʻil-qizlar, xizmat burchini oʻtash chogʻida halok boʻlgan harbiy xizmatchilar va huquq-tartibot idoralari xodimlari farzandlari taklif qilindi.

Tadbirda Samarqand viloyat hokimi Erkinjon Turdimov soʻzga chiqib, bolajonlarni kirib kelayotgan yangi yil bilan tabrikladi. Bu bolalar doimo davlatimiz himoyasida ekanini taʼkidlab, bayramning asosiy tuhfasi - “Prezident sovgʻasi”ni viloyat tashkilotlari rahbarlari bilan birgalikda tantanali ravishda topshirdi. “Prezident sovgʻasi” viloyatda 3-15 yoshdagi 779 nafar oʻgʻil-qizga berildi.

“Prezident archasi” tadbirlari barcha tuman va shaharlarda yuksak koʻtarinkilikda boʻlib oʻtmoqda.

Abdulaziz Yoʻldoshev, “Xalq soʻzi”.