Saxovat benazir qadriyat: tabassum yarashadi senga bolajon!

22:37 16 Oktyabr 2020 Jamiyat
269 0

Jilmayib turgan bolajonga qarab beixtiyor tabassum qilmagan  inson boʻlmasa kerak. Ularning samimiy va pokiza nigohlari,  kulgilari   oʻz-oʻzidan qalblarga koʻchadi va bir zumda aksini beradi.  Aksincha gʻamgin nigohlari dillarni yaralaydi.  Maʼsum chehrasida shodlik iforini koʻrish uchun  dunyolarni berging keladi.

Fargʻona viloyatida istiqomat qilib kelayotgan Muxamet Moʻminov,  Arlen Xayruddinov,  Muhammadaziz Esojonov,  Asilbek  Ahmadjonov, Azizbek Abduhamidov singari bolajonlarga bugun  oʻzgacha kun boʻldi. Ularning  yaqinlari mehribonlari davrasida xatna toʻylar tantana qilindi.  Bu saxovat tadbiriga  Oʻzbekiston nogironlar assotsiatsiyasi  Fargʻona viloyat hududiy boʻlimi, Oʻzbekiston “Adolat” SDP hamda boshqa hamkor tashkilotlar bilan birgalikda bosh qoʻshdilar.  Mehru muruvvatga toʻlgan ajib toʻy Fargʻona shahridagi “Palma” kafesining ochiq maydonida karantin talablariga rioya etilgan holda  oʻtkazildi.

Egniga zarbof toʻn kiyib,  kulib turgan murgʻak qalb egalari afsuski, nogironligi boʻlgan bolajonlar,  kam taʼminlangan oilalar farzandlari.  Ularning yuziga tabassum, qalbiga mehr ulashish niyatida Xalq deputatlari Fargʻona viloyat Kengashi deputati Sherzod Karimov boshchiligida  Oʻzbekiston “Adolat” partiya deputatlari toʻyning shukuhli oʻtkazilishiga hissa qoʻshdilar. Bayram dasturxoni yozilib, bolalar uchun manzur shirinliklar bilan toʻldirildi. Turli esdalik sovgʻalari, oʻyinchoqlar hamda pul mablagʻlari berildi. Multfilm qahramonlari libosida qoʻgʻirchoq teatrining aktyorlari begʻubor qalblariga yana-da quvonch ulashdilar.

— Nabiram  Javohir Ziyovutdinov 8 yoshda, — deydi buvisi Sharofat Mamatisayeva. —  Unga ezgu niyat bilan hatna toʻyi qilmoqchi edik.  Shukurki  bizlarning bu niyatimiz ezgu qalb insonlar koʻmagida amalga oshdi.  Ularga oʻz minnatdorchiligimizni  bildiramiz.

Elimiz suygan sanʼatkorlar, yosh isteʼdod egalari, turli raqs dastalari, xonanda Otabek  Muhammadzoxid oʻz chiqishlari bilan davraga fayz kiritdi.  Bolajonlar, ularning ota-onalari, yaqinlari dilbar kuy-navolarga raqsga tushdilar.

—  Bolajonlarimiz uchun bugun ajoyib tadbir tashkillanibdi,  — deydi  Sanjarbek Haydarovning onasi  Dildora Joʻrayeva. – Ularning quvonchini koʻrib, biz ham shodlandik.  Oʻgʻlim  garchi imkoniyati cheklangan  boʻlsa ham, Toshloq tumanining  30-sonli umumtaʼlim maktabida tahsil oladi.  U bilan faxrlanaman. Tengdoshlaridan qolishmay  aʼlo baholarga oʻqishga harakat qiladi.   Matematika faniga qiziqadi. Kelajakda  oʻqituvchi boʻlishni niyat qilgan.

Hech kim mehr-eʼtibordan chetda emas.  Pandemik vaziyat tufayli  kamtaringina   toʻy boʻlib oʻtgan boʻlsa-da, ezgu niyatlar bilan bolajonlarga   tilaklar bildirildi. Nuroniy otaxon-onaxonlar tomonidan unib-oʻsishlari, kelgusida  davlatimiz, oilasi uchun ezgu amallarni bajarishliklari tilanib duo qilindi.  Bizlarga ham bularning ijobatini koʻrish nasib etsin.

Kamola POLVONOVA,
Oʻzbekiston “Adolat” SDP Fargʻona viloyat Kengashi
matbuot kotibi. 

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?