Ruslanbek Davletov Prezident maslahatchisi lavozimiga tayinlandi

14:28 15 Noyabr 2022 Siyosat
325 0

Oʻzbekiston Respublikasi Prezidentining tegishli farmoniga asosan adliya vaziri Davletov Ruslanbek Quroltayevich Prezidentning ijtimoiy-siyosiy rivojlanish masalalari boʻyicha maslahatchisi lavozimiga tayinlandi.

Ruslanbek Davletov 1980-yil 1-iyunda Xorazm viloyati Shovot tumanida tugʻilgan. Maʼlumoti oliy, toʻrtta oliy taʼlim muassasasi, jumladan 2001-yilda Buyuk Britaniya Varvik universitetini, 2003-yilda Jahon iqtisodiyoti va diplomatiya universitetini (magistratura), 2007-yilda Toshkent davlat iqtisodiyot universitetini, 2010-yilda Oʻzbekiston Respublikasi Prezidenti huzuridagi Davlat va jamiyat qurilishi akademiyasini tamomlagan.

U mehnat faoliyatini 2001-yilda Monopoliyadan chiqarish va raqobatni rivojlantirish davlat qoʻmitasi yetakchi mutaxassisi lavozimida boshlagan. Keyinroq mazkur qoʻmitaning bosh mutaxassis, boʻlim boshligʻi vazifasini bajaruvchi lavozimlarida ishlagan.

2004—2012-yillarda Vazirlar Mahkamasining huquqiy ekspertiza va xalqaro shartnomalar boshqarmasi yetakchi mutaxassisi, bosh mutaxassisi, 2012—2014-yillarda — Oliy sud qoshidagi sud qonunchiligini demokratlashtirish va liberallashtirish, sud tizimi mustaqilligini taʼminlash tadqiqot markazi direktori oʻrinbosari, direktor v. b. lavozimlarida faoliyat olib borgan.

2014—2016-yillarda Prezident devonining Oliy Majlis, siyosiy va jamoat tashkilotlari bilan hamkorlik xizmatining Senat va Qonunchilik palatasi tuzilmalari faoliyatini muvofiqlashtirish sektori mudiri boʻlgan.

R.Davletov Adliya vazirligi rahbariyatini 2017-yil avgustdan buyon boshqarib kelayotgandi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?