Qahramonimiz jahonning taniqli sanʼatkorlari qatorida turadi. U oʻzining 300 milliondan ziyod plastinkasini sotish ortidan Ispaniyaning eng omadli qoʻshiqchisi nomiga munosib koʻrilgan. Bu sanʼatkorning hayoti ham muxlislarda juda katta qiziqish uygʻotib kelyapti. Gap Xulio Igletsias haqida bormoqda.

Bolaligi va yoshligi

Xulio 1943-yilda Madridda tugʻilgan. Otasi mamlakatning taniqli ginekologi sanalardi. Onasi esa uy bekasi. Xulioning bolalikdagi orzusi diplomat, huquqshunos yoki futbolchi boʻlmoq edi. U katolik kollejdagi oʻquv mashgʻulotlaridan soʻng futbol bilan jiddiy shugʻullanayotgandi.16 yoshidan boshlab iqtidorli yigitcha Madridning “Real” klubida darvozabon sifatida faoliyat koʻrsata boshladi. U sportchilarga xos barcha jismoniy koʻrsatgichlarga ega edi. Shu boisdan klub rahbariyati Xulioga katta umid bogʻlagandi.

Lekin taqdir hammasini ostin-ustun qilib yubordi. 1963-yilning 22-sentyabrida Xulio dahshatli avtohalokatga uchradi va ikki yil davomida shifoxona toʻshagida yotdi. Ahvol shu darajada ediki, uning yana yura olishiga umid ham qolmagandi. Yigitchaning baxtiga qoʻllari soppa-sogʻ edi. Shu boisdan davolovchi shifokor ruhiy iztiroblardan bir oz chalgʻisin degan niyatda unga gitara chalishga ruxsat berdi.

Shu tariqa shifoxonada yigitchaning yangi iqtidori yuzaga chiqdi. Qoʻshiq yaratishga kirishdi. Kechalari tanasidagi ogʻriqlardan bezib, uyqusizlikdan zerikib, radio eshitar, romantik ruhdagi qoʻshiqlar yozardi.

Xulio taqdirning bu ogʻir zarbasi oldida taslim boʻlmadi. Avvaliga hassaga tayanib yurdi, oyoqlarini harakatlantirishga zoʻr berdi, nevrologiyaga oid koʻplab kitoblarni oʻqidi. Oxir-oqibat ogʻir dardni yengib oʻtdi. Hozir yuzidagi sezilar-sezilmas chandiq va yengil oqsashgina unga oʻsha mashʼum damlarni eslatib turadi.

Shifoxonadan chiqqach, Iglesias universitetga qaytdi. Uni tugatganidan soʻng ingliz tilini oʻrganish uchun Angliyaga yoʻl oldi. London va Kembridjda tahsil oldi. Madridga qaytib, nafis sanʼatlar Qirollik akademiyasida opera yoʻnalishida oʻqidi. Vaholonki, katolik kollejida bilim olayotgan kezlarida xor rahbari bolakayning qoʻshiq aytishini tinglab, unga hayotda musiqiy faoliyatdan boʻlak istalgan sohani tanlashi mumkinligini aytgandi.

Musiqa

Angliyada Xulio ilk bor koʻpchilik qarshisida qoʻshiq kuyladi. Bu tasodifan roʻy berdi. Doʻstlari bilan koʻngilochar klublardan biriga borgandi. Notanish bir kishining qoʻlida gitarani koʻrdiyu qoʻshiq aytish istagi tugʻilib qoldi. Kubalik qizning baxtsiz sevgisi haqidagi qoʻshiq bu yerda toʻplanganlarni larzaga soldi. Shu kuni Xulio birinchi musiqiy gonorarini oldi.

Kembridjda yigitcha fransiyalik bir talaba qiz bilan tanishib qoldi. Aynan shu qiz uning eng yaqin doʻstiga aylandi. Xulio 1970-yilda yaratgan “Gwendolyne” nomli qoʻshigʻini unga bagʻishladi. Bu asar dunyo miqyosida xit qoʻshiqqa aylandi va sanʼatkorga «Yevrovideniye»da toʻrtinchi oʻrinni olib keldi.

Angliyadan ona shahriga qaytgan musiqachi va bastakor oʻz qoʻshiqlarini ijro etadigan iqtidor egalarini izlash bilan band boʻldi. Biroq kutilmaganda unga mustaqil qoʻshiq aytish va ispan qoʻshiqlari tanlovida ishtirok etish taklifi bildirildi. Moddiy jihatdan ham qulay boʻlgan bu taklifdan ruhlangan qahramonimiz “Hayot davom etadi” deya ramziy nomlangan ajoyib qoʻshiqni ijro etdi. Koʻpchilikka notanish qoʻshiqchi bu asari bilan biratoʻla uchta nominatsiyada gʻolib chiqdi. Bular — “Eng yaxshi ijro”,“Eng yaxshi matn” va “Eng yaxshi qoʻshiq” yoʻnalishlaridir.

Bu shubhasiz, katta yutuq edi.Oradan koʻp vaqt oʻtmay Xulio Iglesias «Yevrovideniye»da Ispaniya sharafini munosib himoya qildi. Uning yulduzli damlari boshlandi.

Talantli musiqachi boshqalardan yaqqol ajralib turardi. Sahnaga doimo qora smoking, oq koʻylakda chiqar, qoʻshiq kuylayotganida muxlislarni hayratga soladigan harakatlar qilardi. Bu uslub muxlislarga juda yoqardi. Shu tariqa u nafaqat Ispaniyada, balki butun dunyoda dovruq qozondi. Xulioni jahondagi ispan tilli eng mashhur ijrochi deb topishdi.

1969-yilda Xulio oʻzining birinchi diskini yozdi. Mehnatkashligi va noyob talanti evaziga 80 dan ziyod albom chiqardi. Dunyoning turli shaharlarida 5 mingdan ortiq konsert dasturini namoyish etdi.«Amor Amor», «Besame Mucho», «Abrazame», «Bayla Morena» kabi qoʻshiqlarini hali-hanuz miriqib tinglashadi.

Shaxsiy hayot

1970-yilda yosh, ammo taniqli boʻlib ulgurgan Xulio juda goʻzal jurnalist qiz Isabel Preysel bilan tanishadi. Xuliodan intervyu olgan qiz uning yaqinda boʻlib oʻtadigan konsertiga taklif qilinadi.1971-yilda toʻylari boʻlib oʻtdi. Ammo 1979-yilda ajrashishdi. Xulioning birinchi nikohidan uch farzandi bor. Ular bilan aloqani uzgani yoʻq.

Isabel bilan turmushi buzilganini turlicha talqin etishadi. Ammo bir narsa aniqki,taniqli musiqachi xotinini juda rashk qilardi. Uni “oltin qafas”ga solib qoʻygandi, desak mubolagʻa qilmagan boʻlamiz. Biroq oʻzining qoʻli ishqiy sarguzashtlardan boʻshamasdi.

Ikkinchi bor u oʻzidan 22 yosh kichik boʻlgan sobiq modelyer Miranda Rinisburgerga uylandi. Undan uch oʻgʻil va ikki qiz koʻrdi.

Xulioning yoshi anchaga borib qoldi. Anchadan buyon tomoshabinlarga koʻrinish bermaydi. Biroq yaqinda u sukunatni buzdi. Pandemiya paytida yaqinlaridan judo boʻlgan, oʻzlarini yakka-yolgʻiz his etayotgan kishilarni qoʻllab-quvvatlash, ularning ruhini koʻtarish niyatida ikkita qoʻshiq kuyladi. “Shu qoʻshiqlar bilan men bu jiddiy vaziyatdan adolatsiz ravishda jabr chekayotgan millionlab oilalarni ertangi kunga ishonch bilan boqishga, hayotga tashna yashashga daʼvat etaman”, dedi u.

Darhaqiqat, yaxshi qoʻshiq, u qaysi tilda yangramasin, barcha zamonlarda odamlar qalbiga malham boʻlgan, ularga bitmas-tuganmas ruh, quvvat bagʻishlagan. Bundan keyin ham shunday boʻlib qolaveradi.

Istam IBROHIMOV tayyorladi.