Quvasoy shahrida toʻrt sektor rahbari faoliyati qoniqarsiz baholandi

11:49 09 Noyabr 2021 Jamiyat
457 0

Foto: Халқ сўзи

Fargʻona viloyati hokimi Xayrullo Bozorov hududlarni ijtimoiy-iqtisodiy rivojlantirish dasturlari ijrosi bilan tanishish maqsadida Quvasoy shahrida boʻldi.

Oʻrganishlar davomida sektorlar rahbarlari faoliyati qoniqarsiz ekani, rahbarlarda masʼuliyat va tashabbuskorlik yetishmayotgani aytib oʻtildi. Xususan, ushbu shaharda tadbirkorlarni qoʻllab-quvvatlash, investitsiya jalb qilish, yangi ish oʻrinlari yaratish, kichik sanoat zonalari faoliyatini rivojlantirish boʻyicha ishlar yetarli darajada tashkil etilmagan.

“Pakana” MFY hududida barpo etilayotgan 11 ta koʻp qavatli uy-joy qurilishi boshlanganiga bir yil toʻlgan boʻlsa-da, birorta uy toʻliq foydalanishga topshirilmagan. “Soyboʻyi”, “Pakana”, “Valik” MFY hududlarida tashkil etilayotgan kichik sanoat zonalaridagi ishlar ham qoniqarli emas. Birgina ikkinchi sektor hududida joylashgan “Pakana” MFYdagi kichik sanoat zonasida ishga tushirish rejalashtirilgan 15 ta loyihaning atigi 3 tasi amalga oshirilayotgani, qolgan loyihalar boʻyicha ishlar sust ketayotgani viloyat rahbari tomonidan tanqid qilindi.

Oʻrganish davomida 22 ming gektardan ziyod qishloq xoʻjaligi yerlaridan foydalanish ham samarasiz ekanligi maʼlum boʻldi. Viloyat hokimi shahardagi ekin yerlarini chuqur monitoring qilish, kamchiliklarni oʻrganish va tahlil etish, qishloq xoʻjaligi ekinlarini tizimli joylashtirish boʻyicha tezkor ishni yoʻlga qoʻyish yuzasidan topshiriqlar berdi.

Botir Madiyorov, “Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?