Foto: Xalq so‘zi

Joriy yilning yanvar oyidan boshlab Oʻzbekiston Respublikasi Prezidenti huzuridagi Davlat xizmatini rivojlantirish agentligi tashabbusi bilan barcha hududlarda quyi boʻgʻin davlat xizmatchilari uchun sohaviy qisqa muddatli malaka oshirish kurslari oʻtkazilmoqda.

Maʼlumotlarga koʻra, mazkur oʻquv kurslariga Qoraqalpogʻiston Respublikasi, viloyatlar va Toshkent shahridan jami 1 ming 300 nafardan ziyod shahar va tumanlar hokimliklari mutaxassislari jalb etilgan.

— Asosiy maqsad tinglovchilarning oʻz sohasida samarali faoliyat yuritishi uchun zarur boʻlgan siyosiy-huquqiy, kasbiy bilim va koʻnikmalarini oshirish hamda keng jamoatchilik va aholi bilan muloqot qilish salohiyatini mustahkamlashdan iborat, — deydi Davlat xizmatini rivojlantirish agentligi Jizzax filiali rahbari Erkin Xalbutayev. — Mazkur kurslardagi mavzular bevosita quyi boʻgʻin davlat xizmatchilarining takliflari va kundalik mehnat faoliyati mezonlari asosida shakllantirilgan boʻlib, mashgʻulotlar tajribali amaliyotchi mutaxassislar hamda professor-oʻqituvchilar tomonidan olib borilmoqda.

Jizzax viloyatida ham 23-yanvardan boshlab 11-fevralga qadar oltita yoʻnalish boʻyicha oʻquv kurslarida 176 nafar shahar va tuman hokimlarining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosariga biriktirilgan bosh mutaxassislar oʻz malakalarini oshirib, sinov jarayonlaridan oʻtishadi hamda belgilangan namunadagi sertifikatlarga ega boʻlishadi.

Tolibjon ERGASHEV, “Xalq soʻzi”.