Joriy yilning 6-aprel kuni Qoʻshrabot tumanida taʼlim muassasasida sodir boʻlgan noxush holat jamoatchilik eʼtiborini tortdi. Maʼlum boʻlishicha, tuman hududidagi 53-maktabda dars jarayoni vaqtida bir ayol oʻqituvchi va maktab direktori koʻz oʻngida oʻquvchini kaltaklagan.

Holat taʼlim muassasasida tartib-intizom va bolalar xavfsizligini taʼminlash masalasini yana bir bor kun tartibiga olib chiqdi. Voqea yuzasidan masʼullar tomonidan oʻrganish ishlari olib borilib, ayolning harakatlariga huquqiy baho berildi.

Aniqlanishicha, fuqaroning xatti-harakatlari bolaga nisbatan zoʻravonlik sifatida baholanib, unga nisbatan Oʻzbekiston Respublikasi Maʼmuriy javobgarlik toʻgʻrisidagi kodeksining 52-moddasi asosida maʼmuriy jazo qoʻllanildi. Sud qaroriga koʻra, ayolga bazaviy hisoblash miqdorining 3 barobari miqdorida jarima tayinlandi.

Mutasaddilar tomonidan bunday holatlarga yoʻl qoʻymaslik, taʼlim muassasalarida bolalarning huquqlari va xavfsizligini taʼminlash ustuvor vazifa ekani taʼkidlandi. Bolaga nisbatan zoʻravonlikning har qanday koʻrinishi qonuniy javobgarlikka sabab boʻlishi yana bir bor eslatib oʻtildi.

Jamiyatda bolalarga nisbatan mehr-muruvvat va hurmat muhitini shakllantirish, ularning shaʼni va qadr-qimmatini himoya qilish har bir fuqaroning burchi hisoblanadi.