Foto: Xalq so‘zi

Navoiy viloyati Qiziltepa tumani “Ayronchi saxovati” fermer xoʻjaligi rahbari S. Jumayev tashabbusi bilan 11 nafar bolajonning sunnat toʻyi oʻtkazildi.

Tadbir avvalida tuman faollari bolakaylarning ota-onalarini qutlab, murgʻak qalblarga bolalikdan singdirilgan ezgulik bir umr xotiralarida qolishini taʼkidladilar.

Maʼlumot oʻrnida qayd etish joiz, “Ayronchi saxovati” fermer xoʻjaligi tumanning peshqadam xoʻjaliklaridan biri hisoblanib, joriy yilda paxta, gʻalla va boshqa qishloq xoʻjaligi mahsulotlari yetishtirishda oʻz zimmasiga olgan shartnomaviy majburiyatlarini oshigʻi bilan ado etdi. Tabiiyki, bunda hududda istiqomat qilayotgan dehqonlarning ham munosib ulushi bor. Fermer ularning zahmatini munosib ragʻbatlantirish maqsadida ushbu tantananing oʻtkazilishiga bosh-qosh boʻldi.

— Biz bugun hududlarning nainki iqtisodiy, balki maʼnaviy barqarorligi hamda ezgu qadriyatlar barhayotligi uchun ham masʼulmiz, — deydi fermer. — Ushbu tadbirga anʼanaviylik tusini berishga qaror qilganmiz.

Tadbirda har bir toʻybolaga toʻn kiydirilib, toʻyona va sovgʻalar topshirildi.

Temur ESHBOYEV, “Xalq soʻzi”.