Davlatimiz rahbarining Konstitutsiyaviy komissiya aʼzolari bilan uchrashuvi davom etmoqda. Unda Prezidentimiz bir qator muhim va hayotiy takliflarni ilgari surmoqda.

“Biz taʼlim, ilm-fan va inson kapitalini rivojlantirishga ustuvor eʼtibor berib kelmoqdamiz. 

Chunki, bugungi shiddatli raqobat zamonida faqat bilimli, maʼrifatli millat va davlat munosib taraqqiyotga erisha oladi.

Ulugʻ ajdodlarimizning yangi barkamol avlodini tarbiyalab voyaga yetkazmoqchi ekanmiz, buning uchun bogʻcha, maktab, oliy taʼlim va ilm-fan sohalarini ustuvor taraqqiy ettirishni konstitutsiyaviy darajada mustahkamlab qoʻyishimiz shart.

Bosh qomusimizda davlat maktabgacha taʼlim, maktab va oliy taʼlim tizimini, turli mulk shaklidagi, jumladan, xususiy taʼlim muassasalarini rivojlantirish uchun zarur sharoitlar yaratib berishi bilan bogʻliq normalar ham boʻlishi lozim.

Ustozga boʻlgan yuksak ehtirom Konstitutsiyamizda oʻz ifodasini topishi zarur. 

Shuningdek, pedagog xodimlarning kasbiy faoliyatiga aralashish, ularning xizmat majburiyatlarini bajarishiga toʻsqinlik qilishga yoʻl qoʻyilmacligini Konstitutsiya darajasida belgilab qoʻysak, oʻylaymanki, adolatdan boʻladi", dedi Shavkat Mirziyoyev.