Foto: Xalq so‘zi

Namangan viloyati Pop tuman adliya boʻlimiga Margʻizor mahallasida yashovchi fuqaro Maʼmurjon Toʻychiyevdan murojaat kelib tushdi. Aytishiga qaraganda, u mehnat qilib kelayotgan tuman yoʻllardan foydalanish unitar korxonasi fuqaroni nohaq ishdan boʻshatib yuborgan.

Masalani oʻrganish jarayonida korxona xodim bilan mehnat shartnomasini bir tomonlama, yaʼni ish beruvchi tashabbusi bilan bekor qilishi jarayonida amaldagi qonun hujjatlariga rioya qilinmagani aniqlandi. Toʻplangan materiallar asosida fuqaro manfaati yuzasidan Chust tumanlararo sudiga daʼvo arizasi kiritildi.

Nizo sud majlisida koʻrib chiqilganidan soʻng fuqaroning buzilgan huquqlari tiklandi. Sudning tegishli hujjatiga asosan javobgar tomonidan M.Toʻychiyev foydasiga uch oylik ish haqiga teng miqdorda kompensatsiya undirib berildi. M. Toʻychiyev sudda ish koʻrilguniga qadar pensiya yoshiga yetganligi sababli murojaatning ishga tiklash qismidan voz kechgan.

Maʼlumot uchun, 2022-yilning olti oyi davomida Pop tuman adliya boʻlimiga jami 219 ta murojaatlar kelib tushgan boʻlib, ulardan 172 tasi qanoatlantirildi.

Qudratilla NAJMIDDINOV,  “Xalq soʻzi”.