Foto: Reuters

Pokiston hukumati masjiddagi portlashdan keyin 23 kishini, jumladan politsiyachilarni hibsga oldi.

Pokiston hukumati Peshovar shahridagi masjidda sodir boʻlgan portlashga aloqadorlikda gumon qilib, 23 kishini, jumladan politsiya xodimlarini hibsga oldi. Bu haqda “Agence France-Presse” (AFP) manbalarga tayanib xabar berdi.

Agentlik maʼlumotlariga koʻra, hibsga olinganlar orasida Peshovar aholisi va Afgʻoniston bilan chegaradosh hududlardan kelganlar ham bor. Bundan tashqari, huquq-tartibot idoralari xodimlari ham hibsga olingan.

Oldinroq shahar politsiyasi boshligʻi Ijaz Xon huquq-tartibot idoralari allaqachon muhim hibsga olishlarga sabab boʻlgan dalillarni topganini aytgan edi.

Shu yilning 30-yanvar kuni Afgʻoniston chegarasi yaqinidagi Peshovar shahridagi masjidda sodir etilgan portlash oqibatida 95 kishi hayotdan koʻz yumgan edi. Ushbu hodisaga munosabat bildirgan Pokiston hukumati bu qabihlik uchun albatta qasos olinishini maʼlum qilgan edi.