Illyustrativ foto

Amerika Qoʻshma Shtatlar Ukrainaga mudofaa byudjetining boshqa bandlaridan hozircha pul ajratishni rejalashtirmagan, biroq kerak boʻlsa, bu imkoniyatni saqlab qoladi.

Bu haqda Pentagon matbuot kotibi Patrik Rayder aytib oʻtdi.

“Qayta dasturlash (mudofaa byudjetining biridan boshqasiga mablagʻlarni oʻtkazish) shoshilinch zarurat boʻlgan taqdirda har doim imkoniyat boʻladi. Ammo hozircha, mening bilishimcha, Ukraina xavfsizligini qoʻllab-quvvatlash uchun qayta dasturlash toʻgʻrisida qaror qabul qilinmagan”, — deydi Rayder.

Uning qoʻshimcha qilishicha, Pentagon AQSH Kongressi bilan hamkorlikda Ukrainaga qurol yetkazib berish uchun qoʻshimcha mablagʻ ajratishni rejalashtirmoqda. Bungacha respublikachi senator Rend Pol AQSH Kongressi Vakillar palatasida Ukrainaga qoʻshimcha mablagʻ ajratilishini butunlay qisqartirish boʻyicha harakat kuchayayotganini aytgan edi.

Unga koʻra, bu, asosan, Amerika parlamenti quyi palatasida koʻpchilikni tashkil qiluvchi Respublikachilar partiyasi kongressmenlariga taʼsir qiladi.

Avvalroq, Gollandiya va Daniya AQSH Ukrainaga F-16 qiruvchi samolyotlarini joʻnatishni maʼqullaganini tasdiqlagan edi.