“O’zikkilamchiranglimetall” aktsiyadorlik jamiyati tomonidan O’zbekiston Respublikasi Innovatsion rivojlanish vazirligi, Yoshlar ittifoqi Toshkent shahar kengashi, “Artel” kompaniyasi hamkorligida uyushtirilgan yarmarkada respublikamizning barcha hududidan kelgan yuzlab yoshlar o’z loyihalari bilan qatnashdi.

— “Robot fermer” Evropa mamlakatlarida keng qo’llaniladi, — deydi Toshkent davlat texnika universiteti talabasi Tursunpo’lat Tilovov. — Mamlakatimizda hali bunga qo’l urilmagani bois, ilk bor ushbu qurilmaning mahalliy modelini yaratdik. U dehqon bajaradigan qo’l mehnatini avtomatlashtirilgan tarzda boshqarish imkonini beradi. Ya’ni turli o’simliklar, gullar va poliz ekinlarini ekadi, parvarishlaydi. Erning namlik miqdorini ham o’lchab, o’z vaqtida sug’oradi. Hattoki, begona o’tlardan tozalay oladi. Buni smartfon orqali masofadan boshqarish imkoniyati ham mavjud. Hozirgi kunda mazkur qurilmadan kichik issiqxonalarda foydalanish mumkin. Maqsadimiz keyinchalik uning katta er maydonlariga mo’ljallangan takomillashtirilgan modelini yaratish niyatidamiz.

O’zbekiston Milliy universiteti aspiranti Mirjalol Qurbonovning neft bilan ifloslangan tuproqlar rekultivatsiyasida agrobiotexnologiyalarni qo’llash g’oyasi ham ko’pchilikni qiziqtirib qo’ydi. Uning aytishicha, biologik tozalash usuliga asoslangan mazkur innovatsion texnologiyani qishloq xo’jaligi sohasida qo’llash natijasida neft bilan ifloslangan tuproq qoplamini 98 foizgacha tozalash, kimyoviy, fizikaviy va biologik xossalarni yaxshilash orqali tuproq unumdorligini oshirishi mumkin.

Qolaversa, uning iqtisodiy samaradorligi ham yuqori, ya’ni har bir gektariga 27 mln. so’mdan ortiqni tashkil etadi. 

Yarmarkada namoyish etilgan innovatsion ishlanmalar biri-biridan qiziq va foydali. Bu esa g’oya o’z atrofiga ikkinchi bir g’oyani qo’shib, kelgusida yirik loyihalar kashf etilishida katta turtki berishi turgan gap.

Shuningdek, tadbir doirasida Sergeli tumanida joylashgan “Yoshlar “Yoshlar Sport City” sport-sog’lomlashtirish majmuasining tantanali ochilish marosimi ham bo’lib o’tdi. Endilikda zamonaviy ushbu majmuada bolalar va o’smirlar sportning tennis, voleybol, futbol, yugurish kabi sportning o’ndan ortiq turlari bilan shug’ullanishi mumkin.